La grande “Gloria” de resivir el Shabat”... En “El Amaneser” d’este mez el lektor puede topar mi teksto sovre la Tradisyon de Noche de Shabat. En los tekstos presedentes avlimos de los diyas de Taanit, de la Tradisyon de Tu-Beav ets... Oy, kontinuando kon muestras tradisyones puedemos mensyonar tres muy importantes komo el Brit-Mila, Pidyon Aben i Vijola. El Brit es la konsekuensa del pakto entre D. i muestro padre, Avraam Avinu. Todo djudio tyene el dover de perpetuearlo i asigurar la partisipasyon de sus ijos a este pakto. Avraam Avinu fue el primer djudio a azer Brit Mila.
El “Pidyon Aben” es una preskripsyon relijyoza konsernando el “Bohor”, el primer ijo de una unyon. Asta ke kompleta un mez, asigun muestra Ley, el apartyene a los “Koanim”. İ, djuntos kon estos djenitores de alkunya Koen, se aze la seremoniya relijyoza tradisyonal, asigun el orden de la Tora: “El Eternal disho a Aaron Akoen: Todo primer nasido de benadam o de beema ke va ser oferto al Eternal, te apartyene. Solamente el primer nasido del umano, lo vas a venderselo estimando un “Pidyon” (fidye) de sinko shekeles de plata” (Bamidbar 18: 15-16).
Antes me akodro, esta seremoniya se aziya en kaza, kon la prezensya de serkanos de la famiya, de la mishpaha. El muevo nasido estava en los brasos del Sr. Koen. En una tavla (tepsi) de plata se metiya unos, kuantos objektos de oro, o paras. Ma, en jeneral era kucharas de plata, si no me yerro, para “merkar” el bebe kompletando un mez. La madre del bebe era vestida komo novya. Despues de las berahot tradisyonalas, el Koen dava un chiko deskorso apuntando la importansa de este diya espesyal. Dezinyando el nasido demandava a la parida: “Es esta tu primera kriatura?”
Sigiendo, tomava los objektos de plata i entregava el nasido a su madre. Esta seremoniya de “Pidyon” tyene una sinyifikasyon simbolika ke se puede eksprimir ansi: “Los djenitores, por sus ijos son prontos a dar todas sus posesyones...” Naturalmente, komo en kada alegriya familyal se uzava a alargar un poko mas las festividades. Se komiya dulsuryas, patiseriyas i la seremoniya relijyoza kontinuava komo una reunyon sosyal o familyal.
Keridos lektores, esto supozando ke ya remarkariyash en mi relato de las seremoniyas del “Pidyon”, empleyi el “modo pasado”. Eran las seremoniyas ke me akodro de mi chikez o manseves. Aktualmente, por siguro ke ay syertas ke se estan tambien azendo en kaza. Ma, mas frekuente las estamos vyendo realizarsen en la ambiansa de una Keila, komo una boda. Naturalmente todos savemos ke los ke tyenen la alkunya Levi i Koen no azen el “Pidyon”. De sorte ke no tengo una eksperyensa, un rekuerdo personal.
Komo dishimos, el primer nasido es el “Bohor”, komo la primera nasida es la “Bohora”. Este nombre muy frekuente se empleya para dezinyar una persona un poko naiva, ke se enganya muy fasilmente. Sintimos ansi ke dizen “No te agas bohor”!!, komo dizir no seyas bovo, no t’enganyes! Es una aluzyon a Esav, el bohor del Patriarka Yitzhak. Esav vendyo a su ermano el derecho de behorod, por un plato de lentejas...
Por terminar, unos kuantos byervos sovre la “Vijola”. Esta seremoniya konsiste a dar un nombre eskojido a las ijikas muevas nasidas. No es solo a la Bohora, ma tambien a kada ninya ke nase, lo ke difera esta seremoniya de la del Pidyon. Kompletando los 8 diyas, se puede azer en el entervalo de los 40 diyas sigientes. Es una trdisyon rejlijyoza. El Rav bendize la kriatura i se aze una chika fyesta.
