Keridos Korelijionarios
En estos diyas ke estamos en la entrada de un anyo nuevo, agradesemos a el Altissimo Dyo ke nos ayego a estos diyas.
Komo todos ya lo savemos muy bien; “Rosh Ashana” no es solo el empesidjo de un anyo nuevo para nozotros los kreyentes Djudios, sino ke es un entervalo apropriado para observar nuestra vida i para deklarar nuestra voluntad de bivir konforme a los preseptos de la divinidad.
Kon otros termos, “Rosh Ashana” es una oportunidad de “Teshuva” por aprovecharse de eya.
“Aseret Yeme Teshuva” ke empesa de “Rosh Ashana” i akava en “Yom Kipur” no nos inspira ni nos komanda de alesharnos de los bienes del mundo, sino ke nos inspira de profitar de estos bienes en ekelibro i konforme a los preseptos de la divinidad.
Siendo esto, la “Teshuva” es un akto ke honra al individuo. Espero i dezeo ke nuestros keridos korelijionarios no mankaran de bien kerer profitar de esta oportunidad.
Dospues de “Rosh Ashana” i “Yom Kipur” fiestamos la fiesta de “Sukot” ke nos akorda la kontinuidad de la proteksion del Dyo i ala fin de esta fiesta tenemos la “Simhat Tora” ke mos aksentua una otra ves la valor absoluta de la Santa Tora en el sirkulo de nuestra vida.
Todo esto nos sinyala la rikeza de fiestas en el mez de Tishri ke alkansimos a su entrada.
Mi dezeo es ke fiestach estos diyas sigun nuestras tradisiones.
Keridos Ermanos
Entre munchas kozas buenas i ermozas kero partadjar kon vosotros un evenemento negativo ke verdadmente me preokupa por el futuro: Los refletos de la kriza ekonomika ke domina en estos mezes en todo el mundo, no solo esta metiendo en difikultad la vida diaria, sino ke esta kavzando tambien la dispersion de la famiyas. Al pareser ainda no se pudo topar un remedio para este kavzo. Kero esperar ke la solidaridad entre la famiya puedera diminuar el efeto negativo asta un sierto punto. Vos konsejo de esforsarvos mas verso este buto.
Mis bendisiones seran kon vozotros.
Keridos Korelijionarios
Nuestos ninios son la siguridad de nuestro avenir. No se deve de neglidjar por elevarlos sigun nuestra ley i nuestras tradisiones. En estos diyas de retorno de una enveranada de deskanso i kampanya devemos de non neglidjar de estimularlos a ke se aserken i seguien a las sinagogas.
Keridos Ermanos
Seya komo seya estamos dentro un periodo de rogar por las buendades i ermozuras. Nozotros los Djudios pertenesemos a una kultura ke siempre se konfiya a las esperansas. Es por esto ke, siendomos en la entrada de “Rosh Ashana” i las fiestas de Tishri vos felisito kon todos mis buenos dezeos, todo en suhetandovos de fiestar munchas fiestas djuntos vuestros keridos en pas i amor i yenos de prosperidad i felisidad en bendiziendovos kon las bendisiones de nuestra Santa Tora.
Tizku Leşanim Rabot, Neimot Vetovot.
Rav İsak HALEVA
El Gran Rabino
