Alhad demanyana Avia alegria en el ayre,en la somptuoza Sinagoga Neve Şalom, adornada de flores, realsada de kantes i de las rizas de ninyos ansi ke de la prezensya de damas atakanadas de vestimyentas de kolores a kolores , todos unidos en la mizma emosyon.
Sovre la Teva, delantre el Hadakodesh avyerto: Arit-Daniel & Yosi Beraha, una ermoza ninya en los brasos, ansi ke a sus lado un chiko joven, el ermano grande ke sera para la mueva nasida un egzempyo a segir en mizmo tyempo ke un kompanyero de djugo. İ de kada parte: los avuelos “Anni Hezki” i “Eliz & Sabi Beraha”, la kara resplandesyente de kontentes.
La ninya fue nombreda
Lia Eliza Beraha
Eya resivyo la bendisyon del Grande Rabino de Turkiya Rav İzak Haleva ansi ke de Rav. Moşe Benveniste i de Rav Naftali Haleva ke mos avlo de la importansa de la famiya en la relijyon i las tradisyones Djudias.
El Todo Podedrozo ke bendiga “Lia Eliza Beraha” ansi ke su ermano i sus jenitores.
Alhad, despues de medyo dia, dos ermozas bodas:
Treysi Sadık & Metin Mitrani
Verda Deşilton & Yusuf Kohen
aunaron sus destinos para una larga, larga vida de amor, armonia, prosperidad i syempre paz en los korasones.
İ lunes demanyana el 21 del mez de desembre, se fyesto kon la mizma alegria, la mizma fervor i la mizma emosyon el Berit Milla de:
Yakup Ceki Romano
İjo de Lüset i Eli Romano.
Amado del Dyo i de la djente ke el sea , ombre de buena ventura , mazalozo, provechozo i poderozo.
Todas muestras felisitasyones i muestros dezeos de alegria i kontentes a las famiyas “Hezki & Beraha”, “Sadık & Mitrani”, “Deşilton & Kohen”, “Romano & Pardo”.
