Proyektos de rekonstruksyon empesaron a ser estudyados en Haiti ...El lavoro sera muy duro por seguro, ay tantos parametros a tomar en konsiderasyon en este lugar avyerto a varyas perturbasyones atmosferikas, ma la esperansa empeso a espuntar en medyo de la dezolasyon jeneral.
El ayudo es grande de la parte de las Nasyones Unidas, de munchos payizes, entre otros la Turkia, partikularmente de la Fransa i sovre todo de los Estados Unidos ansi ke de Israel kon su materyal i sus aparatos sanitaryos portativos i (lo ke es muy importante) su eksperyensa de situasyones urjentes.
... Munchas personas a mitad enterradas en las ruinas, fueron ansi salvadas de una muerte atros...
Ay muncho de azer en este payis ... la partisipasyon del puevlo lokal es imperativa ... las Nasyones Unidas prometyeron una chika paga a los sitizanos ke lavoraran al esforso de rekonstruksyon. Ansi (puede ser) empesara a estableserse un chiko sistema ekonomiko bazado sovre el lavoro personal.
Si.... la esperansa es ainda flaka ma poko a poko se azera mas fuerte i mas konkreta.
