En un kanton pedrido, dezyerto i aislado de Paris una famiya djudia en difikultad. Marido i mujer ovligados de lavorar...sus ija de kuatro anyos en una guarderia de ninyos afin de resivir los primeros elementos de lektura i matematika...
Los primeros dias de eskolaridad fueron fuertes para la ninya arrankada a la kayentor del pecho maternal. A las oras de medyo dia le dyeron una supa de pishkado ke eya refuzo de komer i ansi fue los dias sigyentes...
Kuando el padre i la madre vyeron ke eya yorava kada dia, eyos no pudyeron rezistir i la kitaron de la mestra; kada manyana antes de ir al echo, eyos empesaron a ambezarle a meldar i eskrivir ansi ke a kontar... le davan egzersizes a azer i de mezmo chikas adisyones i sustraksyones... ansi, poko a poko eya empeso a meldar en livros de kuentos i istoryas en Franses.
Ma dos anyos mas tadre, sus paryentes fueron ovligados de deshar la Fransya i de tornar en Turkia.
Sus primer echo fue entonses de mandarla a la eskola la mas serkana ande la sola lengua utilizada era el Turko, lo ke de muevo fue muy difisil para eya. Al empesijo, kuando devia meldar un teksto, lo meldava komo si era un teksto fransez i sus kompanyeras de klasa se burlavan i no se pudian detener de riir.
Esta situasyon turo tres anyos; entre myentres eya se ambezo a metrizar perfektamente la lingua Turka i de dia en dia devino una de las mijores elevas de su klasa.
Un dia un inspektor vino a la eskola i endjuntos kon la direktrisa vijito la klasa. Todos los elevos empesaron a tremblar de espanto. El vijitador se asento i empeso una chika interrogasyon...kaji ninguno pudo responder a las kestyones asta ke la ijika alevante el dedo afin de atraer la atensyon del inspektor ... la direktrisa immedyatamente le disho:” la palavra es tuya” i la ijika sin azer el mas chiko yerro empeso a responder a las preguntas.
A un syerto momento la direktrisa disho al vijitador “esta ijika vino de Fransa, eya no konosia ni un byervo de Turko i oy es la primera de su klasa, un briyante avenir la aspera ....”
(rekuerdo de chikes)
Raşel KALDERON
