En el ultimo numero del mensual “Information Juive” el byen konosido editoryalisto Josy Eisenberg (ombre de grande kultura rabbinika ansi ke de profunda refleksyon filozofika) mos avlo kon una syerta amargura del etnologo Levi-Strauss.
Debasho el titolo “Mon Kaddish pour Levi-Strauss”, el se refero partikolarmente al absoluto dezinteres del grande ombre de sensya por el Djudaizmo .
El fakto es byen konosido i fue mizmo atorgado por Levi Strauss el mizmo en repuesta a la pregunta de un gazetero ke lo avia intervyuvado.
El editoryal en kestyon de Josy Einsenberg mos pusha a formular algunas kestyones ...deke esta absensya de interes por todo lo ke se refera al djudaizmo, de la parte de un djudyo, aunke en la epoka oskura del horrivle masakro nazi, el mizmo konosyo (al empesijo de la gerra)la amenaza de ser embiado en uno de los kampos de la muerte si sus amigos de otra relijyon no parvenian a azerlo fuir a los Estados Unidos?
Sin nunka renyegar ofisyalmente su identidad djudia, su solo interes fue konsentrado sovre las sosyedades primitivas, sus simbolos,sus kodigos, sus totemes i mitolojia ... Su lavoro syentifiko fue inkontestavlemente muy grande i de grande valor para el patrimonyo intelektual universal, ma al nivel simplemente humano eske una koza no parese mankar?
A ningun momente no se trato (de su parte) de menospresyo, ravya o odyo enverso sus korelijyonaryos, ma simplementr de una estranya indiferensya. Eske su formasyon mezma de etnologo no devia, a eya sola, despertar su kuryozidad syentifika enverso un puevlo mileryano, diferente de los otros, ke yeva en su pecho un mensaje espesyal... un puevlo esparsido desde miles i miles de anyos en los kuatro kantones del mundo sin ke los myembros ke lo kompozan (ke se konoskan o no entre eyos) pyedran el kontakto afektivo ke los auna?
Deke el (inkontestavlemente enorme savyo) ke paso kaji la totalidad de su larga vida a estudyar el psishizmo, uzos i reglas de populasyones leshanas, no konsakro un lugariko en su ovra a un puevlo, el suyo, uniko en su varyedad, el kual kon sus kualidades i sus defektos, su kodiche etiko vyejo de siglos, individualisto i en mizmo tyempo universalisto, munchas vezes kritiko enverso si mizmo, un puevlo ovrero de la mas vyeja sivilizasyon, ke supo konservar kaji intakta su kreensa, sin por esta refuzar enteramente la evolusyon, un puevlo ke dyo a la humanidad el “Dekalogo”, fundamyento mizmo de muestra sivilizasyon ?...
Eske en su varyedad mizma al interyor de una koezyon ineksplikavle, el no es dinyo de analizis i refleksyon?
Vemos kon frekuensa entre muestros ermanos: “kontestadores”, “kritikadores kon o sin razon”, “oto-denigradores”, los unos atados literalmente a preskripsyones o tekstos arkaikos, los otros enteramente afrankados de kualkyer observansya tradisyonal... ma a la mas chika amenaza, al mas chiko sinyo de peligro, todos prontos a saltar sovre el enemigo en un movimyento kaji instektivo de solidaridad.
