En el enterval de los 15 dias ultimos; uvo unos evenementos emportantes en muestra komunitad.
Antes dyes dias dos fyestas de “TEFİLİN” de dos mansevos; David Kebudi kon Roy Stroti se realizaron en dos keilas diferentes; una mas emportante de otra.
El tefilin de David Kebudi fue en la sinagoga de Antakya muy istorika i ke ay puede ser mas de 100 anyos ke no se aziya una fyesta asemejante aya; a kavza ke la komunitad djudiya ke biviya en esta sivdad se enchikesyo de dia en dia, i lo ke kedo oy es solo 15 famiyas. 130 personas se fueron de Estambol para esta fyesta, ke envitaron sus paryentes kon una organizasyon ekstraordinarya.
El tefilin de Roy Stroti se realizo en la keila de Burgaz; ke es una keila unika i emportante para los ke biven en la isla de Burgaz.
Los granpapas de Roy; Nesim Hason kon İzak Çiprut (zihrono livraha) fueron unas personas muy emportantes para el desvelopamyento (gelişme) de la sinagoga de Burgaz moralmente (manevi) i materyalamente (maddi).
Eyos fueron muy aktivos (etkin) i mostraron un grande esforso (çaba) para reorganizar i adelantar esta keila.
El granpapa de David; Efrayim Kebudi (ke este en ganeden) fue el presidente de la komunitad de Antakya i el dyo grande servisyo (hizmet) a esta komunitad.
En estas fyestas es de uzo de avlar de los grandes, i akodrarmos de lo ke izyeron, porke las personas son mortales.
Eyos devyenen immortales (ölümsüz) kon las ovras ke azen i kon las buendades ke akomplisan.
Mozotros nombramos a las personas kon lo ke izyeron en sus vidas i kon lo ke desharon a la fin de sus egzistensyas.
Estas tres personas onoravles, son immortales kon los esforsos ke dyeron para pueder azer bivir estos lugares sakros, fina la eternitad (sonsuzluk), (ke sus almas repoze en ganeden).
Una grande pedrita para la komunitad djudiya: “Robert Abudara” (zihrono livraha).
Mansevo de 55 anyos, korajozo, plazentero, lavoro komo volontaryo de alma i de korason para la komunitad djudiya anyos largos i dyo el apoyo (destek) menesterozo en todo modo de difikultades.
El topava solusyones (çözüm) a las problemas los mas difisiles, muy laboryozo, la konosensya (bilgi) ke teniya en diferentes sujetos, la entelijensya i la kapachitad de reushir, i solver las difikultades de la komunitad, mos enfluenso a todos. Despues del atako ke tuvo lugar en el anyo 2003; el ke estava en la sinagoga de “Şişli” para orasyonar; se konsakro a la sekuritad de la komunitad i mostro un grande esforso para protejar las sinagogas i las assosyasyones (kurum, dernek) djudiyas.
El era muy atado a su famiya, un marido bueno, un padre yeno de kerensya, i un buen amigo, un buen alliado (dost).
Kerido Robert; ke tu alma repoze en ganeden, i fuersa i pasensya para suportar tu grande pedrita, a tu kerida famiya.
Enfin; alhad ultimo el presidente del jurnal “Şalom” İvo Molinas; envito a todos los eskrivanos del jurnal a la Koloniya de vakansas de Burgaz, para una reunyon i avlar del avenir del jurnal. Kualo se puede azer de muevo para enalteser el nivel?
Munchos mansevos dyeron sus ideas en diferentes sujetos, i a la fin una nochada kon komer kon los maridos i mujeres todos endjuntos.
Un komer de ermandad entre los kollaboradores.
Para terminar İvo Molinas remersyo a todos ke asistyeron a esta reunyon, i de sus partisipasyones (katkı) al jurnal.
Teneremos syempre okazyones orozas para pueder kontinuar a bivir kon alegriya.
Kedavos en la buena ora; Keridos Lektores!....
