Bill Clinton i Hillary Clinton anonsaron al publiko ke sus ija Chalsea Clinton se kazo kon Marc Mezvinsky en el primo de Agusto. Este evenemiento fue guadrado komo un grande sekreto durante munchas semanas.
‘Oy estamos anonsando kon grande orgolio ke Chalsea i Marc se kazaron kon una ermoza seremonia en Tribunal Astor ke se topa en Rhinebeck, New York. Las famiyas de las dos partes i los amigos los mas entimos asistieron a esta boda’ disheron Hillary i Bill Clinton, i ajutaron: ‘No puediamos tener un diya mas perfekto ke este, para selebrar el empesijo de una vida endjuntos. Estamos muy kontentes de resivir Marc en muestra famiya. En nombre de los muevos kazados, keremos remersiar al puevlo de Rhinebeck ke mos resivieron de korason, i por sus buenos dezeos por los muevos kazados’.
Mas de kuatrosientos envitados asistieron a esta boda istorika. Komo Marc es judio, la seremonia fue konduizada por un rabino i un reverendo. En la seremonia se meldo un poema de Leo Morc ‘La Vida ke Tengo Segun la Famiya’. La boda kontinuo asta las tres i media de la media noche.
Las famiyas Clinton i Mezvinsky se konosieron en el anyo 1990, i se izieron amigos entimos. Chalsea i Marc se konosieron en un weekend ke las dos famiyas pasaron endjuntos. Marc reusho a konvenser Chalsea a entrar a la Universidad de Stanford ande el estava elevo, i los dos mansevos meldaron endjuntos en Stanford. Unos kuantos anyos duspues empesaron a flortar, i en el Thanksgiving del anyo 2009, se espozaron.
Marc Mezvinsky es banker investor. El es el ijo de Marjorie Mezvinsky, vieja kongresista de Pennsylviana, i Ed Mezvinsky, viejo kongresisto de İowa. Marido i mujer son divorsados.
La boda de Chalsea fue muy diferente de las otras bodas istorikas. Todas las otras bodas se selebraron komo un diya de fiesta del pais. Ma esta boda se guadro komo un grande sekreto fin al diya de alkavo, mezmo los organizatores, las kuzinderas, los envitados djuraron ke no vana avlar a dingunos sovre esta boda, i la seremonia tuvo lugar kon grande sekuridad. No kale olvidar ke estamos biviendo en un mundo de atakas teroristas, i por suguro la famiya Clinton no ivan a estar repozados si las gazetas avlavan por los aparejos de la boda. Miles de personas i de gazeteros se ivan a reunir en Rhinebeck de un diya antes, i por suguro los teroristos no ivan a estar repozados. Agora ke eskapo todo, estomos meldando los detalyos de la boda en las gazetas. Suguramente esta boda va ser uno de los prensipales eventos de la istoria amerikana.
Los amerikanos siempre la kijeron bien a Chalsea. Chalsea siempre estuvo kon boka serrada, i nunka respondio las kestiones de los kritikos durante los anyos de politika de su padre. Por modo de esto, los amerikanos de todas las tendensias i opiniones no puedieron eskrivir nada sovre eya. Ma todos puedemos imajinar los sentimentos de Chalsea durante la trajediya ke tuvo lugar entre su madre i padre.
Chalsea suvriyo muncho en estos anyos. Eya ne teniya una ermana i no puediya tener una amiga de konfiensia kon ken puediya esbafar. Malgrado estas sufriensias, Chalsea reusho a pueder estar empies enriva de sus piezes, i a mentener su dignidad kon la kavesa en alto. Eya nunka respondio las kozas feyas ke el mundo avlo por su padre, i no avlo mezmo un biervo a dinguna amiga sovre la trajediya ke se derrulo.
El kazamiento de Chalsea i Marc kon un rabino i un reverendo, por seguro va ser maraviyozo en los ojos de algunas personas, i orivle en los ojos de otros. Ni Chalsea ni Marc no rejetaron sus identidad. Mezmo si no mos esta plaziendo, parese ke, de agora en delantre, los kazamientos de dos personas kon diferentes identidades va ser la mueva realidad de muestra epoka.
