Estamos bivyendo el final del mez de Elul, aparejandomos a arresivir Tishri i las Fyestas. Elul tiene la partikolaridad (özellik) de ser el ultimo mez del kalendaryo ebraiko. Estamos vyendo semana por semana, los “Diyas Temerozos”, aserkarsen... Diyas yamados “Yamim Noraim” i konsiderados komo una peryoda de djuzgamyento, arrepentimyento o regretos...
El orijen de esta peryoda ampeso durante el “Egzodyo” de los Djudios salvando del esklavaje (esaret) de Misraim. Vinyeron al Monte Sinay para resivir la “TORA”. En el 16 de Tamuz, kometyeron el grande pekado de la “Vakita de Oro”. Moshe Rabenu, abashando del Monte kon las primeras Tavlas de los “10 Komandamyentos” vido los Djudios en idolatriya (tapınma). A la vista de este renyegamyento (inkar), “Se ensanyo”, echo las “Tavlas” de pyedra i las rompyo. Era el 17 de Tamuz (*).
En el primo de Elul, Moshe Rabenu fue “Ordenado” de suvir al Monte Sinay para resivir las sigundas “Tavlas de la Ley”. En el 10 de Tishri abasho kon el sigundo set de los “10 Komandamyentos”. Esto era la sinyifikasyon del pardon “Selesto” (Tanrısal) verso su puevlo. Este diya de 10 Tishri fue dezinyado komo “Yom Kipur”, diya de grande pardon. Desde akel tyempo, los diyas entre 1 Elul- 10 Tishri fueron una peryoda espesyal, de egzamen de konsensya, de “Teshuva”, de pedronansa. Por esta razon Elul es dicho ser “Mez de oportunidad” i de piadad: “Hodesh Harahamim”... En Elul, el Shofar de las orasyones de demanyana mos aze akodrar ke Rosh Ashana i Yom Kipur estan serka.
En el presipyo del anyo pasado, en estas fyestas, izimos la promesa de amijorearmos. En ke grado reushimos? Es ke por una razon o otra, mankimos a muestra palavra? Malgrado todo, si izimos yerros, faltas, o puede ser mizmo pekimos, El Todo Poderozo mos pedronara si muestro arrepentimyento es sinsero. Desde el “Rosh Hodesh” de Elul, el Djudio se apareja ( o deve aparejarse?) a un analiz i interrogasyon personal (kendini sorgulama) kon sinseridad. Deve azer su oto-kritika, bushkando remedyos de adovar (si se puede dezir ansi) sus faltas o yerros. En una manera, es komo revizar su komporto myentres el anyo i azer un “bilanso” moral.
Aki un paragrafo de un artikolo miyo eskrito antes unos, kuantos anyos: (**) “Los diyas redutavles (Yamim Noraim) konosyeron grande alegriya i momentos de grande entuzyazmo. Fue en Rosh Ashana ke tuvo lugar el estrenamyento del “Templo de Yerushalayim” por el Rey Salomon (Shelomo Ameleh)”...
Rosh-ashana, Yom Kipur, Suka i Shofar... byervos de los otonyos de mis 7-8 anyos... Teniyan para mi una sola sinyifikasyon (anlam). Era para mi la fin del enverano, ir a la eskola. Poko despues, grasyas a mi kerido Nono (de b.m) me ambezi... El mez de Tishri es mez de orasyon, de pardon, ma es tambien mez de fyestas i alegriyas. En Rosh-ashana fyestamos la kreasyon del Mundo. De este punto de vista difera de las otras fyestas djudias ke selebramos o komemoramos (anmak) un evento istoriko.
Oganyo el 9 Septembre (1 Tishri) estamos bivyendo una koensidensa sinyifikante (anlamlı rastlantı). El primer diya de Rosh-Ashana muestros amigos i vizinos muzulmanos estan fyestando tambien el primer diya de la Fyesta de Ramadan. Sueto ke seya un siman de ermandad de las relijyones, de paz i entendimiento mutual (karşılıklı anlayış).
Una de las Mitzvot ke la Tora mos preskrivyo por el diya de Rosh-Ashana, es de sintir el Shofar. A Kada vez ke lo sintimos, dizimos : “Ayom Harat Olam”... Oy mozotros selebramos el evento ekstraordinaryo de la kreasyon del Universo... Sueto ke la mueva anyada seya manadera de favores divinas, de paz i repozo para el mundo entero Amen. SHANA TOVA- HAG SAMEAH.
(*)-Taanit de “Shiva Asar Betamuz”.
(**)-Gran Rabino Moshe Levy (“Los Muestros”).
