Keridos Korelijionarios
Keria empesar a mis suhetos de Rosh Ashana este anyo kon la rogativa “”Tahel Shana Uvirhotea” i los kero enkoronar mis dezeos agradesyendo a El Todo Poderozo ke nos ayego i este anyo tambien a la entrada del nuevo anyo kon toda nuestra famiya, nuestros keridos i serkanos, kon sanedad i pas.
“Baruh Şeeheyanu Vekiyemanu Veigiyanu Lazeman Aze”
Aunke en el anyo ke estamos kompletando sufrimos de algunas negatividades komunales komo individuales, ke nos espartimos eternamente de algunos de nuestros keridos i ke eskontrimos algunas desilusiones, nuestra ley i nuestra kultura nos rekomenda de observar nuestro futuro kon buenas esperansas todo en no olvidando el pasado, i de animar nuestra konfiensa a El Todo Poderozo ke nos guarda i nos proteja todo el tiempo.
Komo ya lo savemos muy bien el Rosh Ashana nos prezanta oportunidades bien emportantes a nozotros los de la fe Djudia: El revizar nuestra kondukta ke tuvimos mientres el anyo ke estamos kompletando i tornar de nuestros defektos todo en prometiendo de no repetirlos i el estar en armonia kon los preseptos de El Todo Poderozo afin de refujiarnos a su alta perdonansa son algunos de estas oportunidades.
“Ayom Arat Olam, Ayom Yaamid Bemişpat”
“Oy Se Manifesto el Universo, Oy Se Viene Al Juisio”
Lok e se kere dizir kon esta fraza ke se repeta munchas vezes en la orasion de Rosh Ashana es de juzgar kada uno i uno de nozotros nuestro propio egoismo
i de mostrar su voluntad de arreglar su kondukta sigun los preseptos divinos.
İ por mas; kada uno de nozotros deklaramos esta voluntad en testimonio de sienes de nuestros korelijionarios ke se topan en las sinagogas ke i esto mos kompromete kon El Dyo i kon nuestros korelijionarios.
Keridos Ermanos
El periodo ke empesa kon Rosh Ashana alkansa despues de Yamim Noraim a Yom Kipur ke suplikamos la perdonansa de nuestros pakados i despues Sukot ke rengrasiamos al Dyo por su proteksion a nuestros antepasados todo en alkansando a Simhat Tora ke fiestamos el empesijo del nuevo sirkulo de la lektura de la Tora.
Se remarka ke el mez da Tişri es un periodo pleno de enerjia spirituala por nozotros los judios. Esto bien siguro ke profitarash de esta oportunidad i de kompletar todo lok e es de menester.
Siendo yeno de estos pensamientos i sentimientos vos felisito kon toda mi sesnseridad i vos bendigo kon mis deseos de“Tizku Leşanim Rabot Neimot Vetovot”en suhetandovos sanedad, bienestar i prosperidad.
Rav İsak HALEVA
Gran Rabino
