Estamos kontinuando a selebrar el mez de Tishri. En el kuadro de estos diyas santos de fyestas, pensi de relatar unas leyendas durante dos tres semanas. Oy vamos a meldar un pasaje tomado del “Midrash”.
Bithia, la ija de Paro, en el bodre del Rio Nil, topo un bebe, eskondido aryento de un sesto. Lo tomo, se lo yevo al Palasyo i lo kijo muncho byen. Un diya, lo trusho ande su padre. Teniya la esperansa ke, la inosensya (masumiyet) de esta chika kriatura iva ablandar el korason de Paro, puede ser azerle trokar su komporto inumano (insanlık dışı) enverso los Ebreos.
Eya mizmo, aviya topado melizina a su hazinura.(lepra) desde ke aviya adoptado el chiko abandonado. En desparte, la Prensesa, kon tyempo, desho la adorasyon de los idolos (putlara tapmak) i topo el kamino de D… Era por esta razon ke tomo el nombre de Bithia, ke sinyifika “ İja de D..”
Un diya, el chiko al kual le aviyan dado el nombre de MOSHE, estava asentado en la pyerna del Rey. Apanyo la korona de Paro, i la echo en basho. Este djesto de la kriatura, se le asemejo komo un mal oguryo (kötü bir alamet) a Paro, ke era una persona superstisyoza (batıl inançlı). Yamo sus konsejeros, sus endevinos, i les konto el insidente demandandoles de komentarlo (yorumlamak).
Estos disheron: “Sin duda, esta kriatura, un diya te va arrovar la korona i el trono. Matalo antes ke se tope en estado de azerte danyo”. El Rey estava en el punto de segir el konsejo de estos ombres kruelos (zalim). Vino Jethro, uno de sus konsejeros, i le disho:
“Es de muestro dover de verifikar si en verdad el djesto de esta kriatura inosente deve ser interpretado komo un negro presaje. Puede ser ke el djesto no tyene dinguna importansa. Es ke seriya razonavle de bushkar una sinyifikasyon en los komportamyentos de las kriaturas?… A mi si keda, azeremos una eksperyensa, kon un plato kontenyendo pedasos de oro i otro kon brazas. Si el chiko alarga la mano verso las brazas, al koste de kemarse, es ke las kozas ke briyan lo travan mas muncho. Ma, si a la kontra, la mano se va verso el oro, vamos a entender ke en tokando la korona real el mos dyo un sinyo ke no ogura nada de bueno.”
El konsejo le plazyo a Paro, i ordeno los dos platos. El uno, yeno de oro puro, i el otro de pedasos de brazas… Moshe ya estava alargando la mano al oro, kuando un Andjelo invizivle, abashado de los Sielos, tomo la mano i la yevo a las brazas. El chiko, se kemo los dedos, empeso a echar gritos, ma ya estava salvado…
En todo kavzo, este evento tuvo otras konsekuensas. Para kalmar la kemadura de sus dedos, Moshe se yevo la mano a la boka. Ma, el teniya dayinda un pedaso de karvon en la mano, i ansi se kemo la alguenga. Es por esta razon, ke tuvo difikultades kuando fue en edad de avlar... Esto mos ambeza una koza: no es solamente a la elokuensa (güzel konuşma yeteneği) de Moshe Rabenu ke los Ebreos anyos despues van a dever sus delivrensa (kurtuluş) de Misraim ma tambyen a la Providensa Divina (Tanrının inayeti)...
Manadero: “Contes et Légendes d’Israel”.
