El 13 Mayo 2010, la Gazeta ofisyal de Turkia publiko una komunikasyon historika echa de la parte del Primer Ministro Recep Tayyip Erdoğan, konfirmando la total igualidad de derechos entre la grande Mayoria Muzulmana i las Minoridades de otras konfesyones ke se topan en el Payis.
La totalidad de esta komunikasyon vos es prezentada en lingua Turka en esta mizma edisyon de muestra gazeta. Muestra pajina (por falta de lugar) vos da debasho de estas linyas, un chiko rezumen en djudeo-Espanyol del empesijo de la deklarasyon en kestyon:
“En el kuadro del Prinsipyo de igualidad ke se topa en muestra Konstitusyon, los kompatriotes Turkos ke son de otra relijyon ke la Muzulmana, son komo todos los otros sitizanos un pedaso inseparavle de la Republika Turka i son libros de egzersar en desparte de la identidad i Kultura Nasyonal, sus propya kultura i identidad relijyoza.
Estos sitizanos azen parte integral de la Nasyon i del Estado Turko i es muy importante de azerles sentir ke son enteramente iguales a todos los otros en sus derechos sivikos.....”
