Una grande seremonia de homenaje sera organizada en Paris, Alhad el 6 Junyo, en sinyo de admirasyon i de gratitud enverso el immenso lavoro del Profesor Haim Vidal Sephiha ke fue uno de los primeros a luchar afin de salvar del olvido el “Djudeo-Espanyol”.
En desparte de los multiples livros ke el eskrivyo a este sujeto, Haim Vidal Sephiha pudo krear una katedra en la prestijyoza Universidad “La Sorbonne” ande se empeso a ensenyar i estudyar muestra lingua etnika i de mezmo kreo un sentro de ensenyansa popular debasho la denominasyon “Vidas Largas”.
Tambyen, el mizmo vyejo rerskapado de los kampos de la muerte nazis, Haim Vidal Sephiha lucho para ke una plaka tumbal en Djudeo-Espanyol sea adjuntada a las ke ya se topavan en el grande simenteryo de Auschwitz-Birkenau.
Todas muestras felisitasyones i muestra admirasyon por su inolvidable lavoro ansi ke toda muestra gratitud por su interes en favor de la evolusyon de muestro dialekto ansestral en Turkia.
