Shabat despues de midi estuvimos envitados al kokteyl ke se izo en el salon del jurnal “ŞALOM”, para selebrar los tredje anyos del lavoro de Tilda Levi.
Aviya muncha djente, su famiya, sus kolavoradores (mesai arkadaşı), el ultimo presidente de muestra komunitad Silvyo Ovadya, el presidente onorado (onursal başkan) de muestra komunitad Bensiyon Pinto, el presidente del konsilyo administrativo (idari kurul) Moris Levi, el muevo presidente del konsilyo de administrasyon (yönetim kurulu) Yakup Barokas, el administrador djeneral de la publikasyon (genel yayın yönetmeni) İvo Molinas, todos los eskrivanos, i eskrivanas (yazar) del Şalom, mansevos, aedados, eskrivanos en la lingua turka i en la lingua djudeo-espanyola, i otros partisipantes (katılımcı).
Tilda fue una koordinatrisa djeneral de la publikasyon (genel yayın koordinatörü) del jurnal “Şalom” muy reushida.
Es una persona ke tyene una atitud diferente (farklı davranış), un korason riko, save la responsabilitad del dover, da konfiensa al den frente, una madre yena de kerensya, simple (sade), modesta (mütevazi), avla poko ma propyo (az ve öz), djusta, laboryoza ke todos la keren byen.
Eya entelijente, onesta i korekta (dürüst) tyene konfiensa en si mizmo (kendine güvenir) i sin enalteser la boz, eya defende sus ideas fina la fin.
Da valor al den frente, i su egzistensya es muy presyoza.
Despues del kokteyl, Ester Yannier envito a İvo Molinas allado, para prezentar una plaket a Silvyo Ovadya; por la reushitad ke tuvo en su misyon de Presidente en los sej anyos pasados i lo remersyaron.
Ester; konto la amistad, la solidaridad, el apoyo (destek), el transfero de la saveduria (bilgi aktarımı) ke tyenen en la famiya del “Şalom”, profesyonales kon los volontaryos i ke eyos forman un entero (bir bütün), sin tener una hiyerarshi entre eyos.
A la fin, le prezentaron una plaket de agradesimyento (teşekkür) por todo lo ke izo en estos tredje anyos.
A la fin de todas las avlas sentimentales, del presidente i de los dirijentes del Şalom, Tilda tomo la palavra i izo una avla kurta.
“Keridos kolavoradores, Presidente i mi Famiya muy Presyoza;
Oy kero komemorar los amigos ke no estan mas entre mozotros ma ke se kontan komo la rikeza del jurnal.
Leyle İpeker, Gila Kohen, Meri Asayas, Lizet Cur, Salamon Bicirano, Ziya Alkaş i Eli Perahya ke esten en ganeden.
Pasi 27 anyos de mi vida komo volontarya i profesyonal en este jurnal. Mi primer patron era Silvyo Ovadya i para mi, syempre fue el patron en mi vida ke pasi en el Şalom. İzimos munchas kozas emportantes kon el.
La fonksyon (işlev) la mas emportante en un jurnal es; de edukar las personas (insan yetiştirmek).
Las personas djustas ke lavoran allado de mozotros u en lugar de mozotros, son los pasos los mas emportantes para el avenir de un jurnal. Ma, despues de 13 anyos, kale entregar (teslim etmak) la misyon a una persona ke tenej konfiensa. İ por esta kavza Virna fue para mi una shans.
La amistad, la kerensya i las amigas.
Mizmo ke va kontinuar komo volontarya, ya esto sigura ke este amigable va kontinuar entre mozotros.
Pasi unos anyos muy ermozos aki. Me ambezi muncho.
Va estar muy kontente si puide dar, la miyatad de lo ke tomi en estos anyos.
La famiya del jurnal Şalom se engrandesyo muncho. Todos soj muy presyozos para mi.
Kero remersyar a mi marido ke me dyo el apoyo el mas grande en estos anyos.
Kero terminar mi avla kon una dicha de “Garcia Marquez: “No yores porke vinites a una fin, riye porke la puidites bivir”.
İ yo esto sonriyendo (gülümsemek) i vos esto remersiando”.
A la fin; munchos de los partisipantes avlaron por Tilda, kontaron los rekuerdos i los dias ermozos ke pasaron endjuntos.
El dia se termino kon una pasta savroza, i todos kontentes la felisitaron por todo lo ke izo.
Kerida Tilda; te oguro una vida yena de sanedad felisidad kon toda tu famiya kerida, i reushitad en todos los espasyos.
