Despues kaji 20 anyos de prezensya i de lavoro intensivo al seno del komite administrativo del Şalom, Tilda Levi se retiro de su posto de direktora del servisyo de edisyon de la gazeta. Eya metyo fin a su aktividad profesyonal, afin de konsakrarse a varyas otras kargas komunales ke le fueron konfiadas, sin por esto demisyonar de su lavoro de eskritora.
Su sinyatura figurara ainda largos anyos debasho numerozos artikolos, kon su manera de eskrivir direkta i en mizmo tyempo sensivle, ke mos plaze tanto. Dunke, eya sera syempre prezente en el Şalom, fizikamente kuando sus muevas responsabilidades lo permetran i abstraktamente grasyas al sentimyento de amistad ke desho detras de eya.
Esto no empidyo ke la semana pasada, lunes demanyana, tuve una sensasyon de tristeza kuando vide su sia vazia ... sensasyon de absensya, sensasyon tambyen de lo ke yamamos en Estambol “eskarinyo”, un djenero de nostaljia mesklada de kerensya, de los dias pasados, kuando le dava a meldar artikolos de loskualos personalmente no estava muy segura .
18 o byen 19 anyos antes, ahuera las eskritas tan valorozas del defundo Salomon Bicerano (de bendicha memorya), los artikolos en Djudeo-Espanyoles eran relativamente raros i Tilda me demandava de eskrivir largamente afin de inchir la pajina... Eya mizma ansi ke Ester Yannier i Nelly Barokas empesaron a eskrivir i syempre persiste en mi korason el dezeo de verlas partisipar a este chiko esforso afin de salvar del olvido el idyoma ke mos desharon muestros aguelos..
Konosi Tilda en el lokal mizmo del Şalom, antes ke yo empese a eskrivir, kuando me iva aya para las ultimas koreksyones del livro de proverbyos; eya se topava en la gazeta para ayudar el Staff de redaksyon de la epoka; la kamareta de las sekretaryas se topava abasho, serka de la entrada, i syempre en pasando eya se aparava a la puerta, me demandava en ke estava el lavoro, envezes meldava dos o tres refranes i se metia a reir kuando los topava estranyos.
Tilda fue syempre para mi komo un apoyo, una persona kon lakuala es muy agradavle de lavorar, kon lakuala se puede diskutir i sovre todo ke save oir i entender.
Por seguro ke su partensya es parsyal i provizorya. kada persona ke lavora al seno del Şalom tyene inevitavlemente la sensasyon de apartener a una mizma famiya, kada una kon sus propyas ideas, su propya manera de ver las kozas, kada uno diferente de los otros , ma todos unidos por un mizmo dezeo i un mizmo ideal: “afirmar muestra identidad djudia sin por esto kedar serrados a lo ke se pasa al entorno...
