Testimonyo de amistad de muestra kon-ermana Rachel Bortnick Rachel Borntick nasida en İzmir , aktualmente sitizana de los Estados Unidos ande avia ido antes munchos anyos kumplir sus estudyos universitaryos, a la sigida de los kualos se avia kazado i instalado, no pudo nunka despegarse de su patria de nasimyento ni de la komunidad Djudia de Turkia a la kuala eya se syente syempre apartenir afektivamente.Komo testimonyo de karinyo eya syempre eskrive al sujeto de su ermozo payis de nasimyento i de lo ke se pasa en muestra kolektividad. Ansi, mos mando varios paragrafos de lo ke eya eskrivyo al sujeto de la pasasyon del posto de Prezidente de muestra komunidad a Sami Herman i de la reeleksyon del Gran-Rabino Rav Isak Haleva, ke vos transmetemos tekstualmente debasho de estas linyas:
En los ultimos mezes uvo unos trokamientos en la komunidad djudia de Turkia, ke meresen ser mijor entendidos i apresiados. El 25 Marso 2010, Silvyo Ovadya termino sus sesh anyos komo presidente de la komunidad de Turkiya i a su lugar paso Sami Herman ke fue su amigo, kolaborador i vise prezidente. En 2 Mayo, 2010, el Rav Isak Haleva fue re-elejido komo Hahambashi (kapo-haham, o granrabino) del pais para sirvir siete anyos mas.
Para mijor apresiar la valor de estos lideres ke lavoran por el bienestar de la komunidad djudia-turka, desidi de dar en este kurto espasio unas enformasiones sovre el posto de Hahambashi, ke fue establesido por el sultan otomano Mehmet II, konosido en turko komo Fatih “l konkistado”, porke en 1453 avia konkistado Estambol,, de los Bizantinos. El Hahambashi Otomano representava a todos los djudios del imperio, tenia grande otoridad i azia parte del divan (konsilyo administrativo) del sultan. El primer hahambashi fue el Rav Moshe Kapsali (1453? - 1495?) ke estava kuando arivaron los egzilados de Espanya en 1492. Despues ke el Imperio se desparesio, la Republika Turka ke tomo su lugar en 1923, adopto el sistema de Hahambashi. En el Imperio Otomano el Hahambashi kedava en su posto asta su muerte, i ansi fue tambien kon los grandrabinos en la Republika Haim Moshe Becerano (1920 -1931), Haim İshak Saki (1931-1940), Rafael David Saban (1940-1960), i David Asseo (1961-2002). Haim Becerano i Haim İshak Saki no fueron elijidos komo Hahambashis ma fonksyondron komo Hahambashi Kaymakam i el Rav Rafael Saban fue elijido komo Hahambashi dospues munchos anyos ke fue elijido a este posto. Rav Isak Haleva se izo Hahambashi en 2002, despues de la muerte del Rav David Asseo, d.b.m., ke estuvo en este posto por 41 anyos. Poko despues la Comunidad Cudia demando a el ministaryo de Interior de trokar la ley i demando de elijir el Hahambashi kada siyete anyos.
El semanal djudio Shalom de Estambol dio grande lugar a las eleksiones, a entrevistas kon el Rav Haleva, kon Silvyo Ovadya, i kon Sami Herman i a artikolos de alavasiones i felisitasiones para eyos no ay duda ke eyos ganaron una admirasion muy meresida de parte del publiko djudio.
El granrabino es naturalmente el shef relijiozo de la komunidad turka entera,i tiene el ayudo del konsilyo relijiozo. Ay tambien un konsilyo sivil en Esambol ke es responsarte de representar todos los Judios de Turkia contra el governo, contra los antitades ofisiales i diplomaticas. En kada sivdad las komunidades djudia, eskoje su prezidente. (En Izmir, el presidente es el infatigable Jak Kaya, vizino i amigo de chikes mio.) La mas grande komunidad de Turkia esta en Estambol (kon unas 20000 personas, de las 23000 en el pais), i por esto el presidente de la komunidad tiene un rolo mas emportante i visible en el pais. Las administrasiones sivil i relijioza en munchos kavzos tienen ke kolaborar i tomar desiziones endjuntos.”
Toda muestra gratitud a muestra amiga Rachel Bortnick por azer konoser la formasyon de muestra komunidad a sus konsivdadinos aktuales.
Rachel Bortnick
