Oganyo, treser Alhad de Junio el 20, se va selebrar el “Diya del Padre”. Esta selebrasyon tiene un pasado de kaji un Siglo. Portanto, syempre tuve la impresyon ke kedo un poko debasho la solombra del “Diya de la Madre”.No kero ke me entendash yerrado. Naturalmente no es el Padre ke keda en la solombra, es el Diya... El Padre, idolo i eroe del ijo...el Padre, primer amor de la ija komo puede kedar en la solombra??...
Si no me yerro, tengo meldado una fraza semejante de un psikologo: “El entereso ke amostra una kriatura a su padre depende mas o menos del entereso i aserkamiento de la madre enverso su marido...” El akordo i armoniya entre los djenitores, sus konfiensa resiproka, produize un sentimiento de siguridad en la kriatura. Progresivamente ampesa asekarse i de su padre. Komo ya lo savemos todos, es en la natura de las kozas ke la kriatura en primero se siente mas serka de la madre, kon una impulsyon naturala.
Estamos vyendo de mas en mas ke, entre los ijos i el padre se esta establesiendo una relasyon de karakter, komo ke diga?... una relasyon mas amikal. Padres, ijos (i ijas siguro) estan mas muncho komo amigos. Naturalmente, esto deve tener frontieras. El padre deve perkurar a konservar su “otorite”. Ma, atansyon!! En instalando una dishiplina i otoridad dura, el padre lo ke puede sembrar es espanto en los chikos korasones. Par konsekuensa, en avlando de relasyon amikal, esto no deve ser entendido komo deskararsen o pyedrer el “kontrolo”. Siguro ke no kero dizir ansi. A la kontra, yo syempre pensi ke seya la madre seya el padre, deven konservar una doza de otoridad i no akseptar todos los “kaprichos” i mankuras de respekto de la parte de sus ijos.
No se ke grado es derecho de afirmar ke el padre es el “shef de la famiya”. Me parese a mi ke es komo una indjustiya a la madre. Siguro depende en ke sensyo se da este “kalifikativo”. No enyego ke el padre fue syempre el “pilar”, el simbolo de siguridad i el protektor de la famiya. Si es por dezinyarlo “shef” del punto de vista materyal, aki kale pensar un momento. Ya es verdad ke el padre fue el ke lavora, “trae pan a kaza” i la madre la ke se okupa del nido, de las kriaturas ets... Ma, esto en mayoriya, oy kedo en el pasado.
Devemos atorgar ke aktualmento trokaron las kondisyones, el modo de bivir, el estandart de vida i otras kozas. Un grande shifro de mujeres lavoran por diferentes razones. No vo irme al fondo de este aspekto, porke oy no estamos azyendo un artikolo sovre las madres i no azeremos indjustisya a los padres. Par kontra, eyos estan tomando una parte aktiva i en kaza al lado de la madre.
Klaro ke syempre el es el “temel”, el pilar del nido i el ke kontinua a “traer” pan a kaza. Oy, todo en konservando estas kualidades, se enrikesyo de otras muevas. Lo estamos vyendo ayudar en kaza a syertas okupasyones, ser amigo de djugo de los ijos, enteresarse de serka a sus instruksyon, azer espor, ir a las maches kon eyos ets... La relasyon pozitiva i a un grado “amikal” entre padre i ijos, es una asiguransa para eyos... Asiguransa konsernando el mundo eksteryor i sus futuro tambien.
Por siguro no es fasil de ser padre i madre. El interkambiyo de entendimiento, de akordo i armoniya entre eyos aze un efekto psikolojiko muy pozitivo sovre las kriaturas. Orozos son los ijos ke se engrandesen en esta atmosfera de kerensya i kompreansyon.
