Tener aliados (dost) i amigos es un mazal (şans) emportante en la vida. En la epoka ke estamos bivyendo; todos tyenen problemas diferentes; seyga kon la ekonomiya ke esta briyando i los espasyos de echo ke se estan aminguando, seyga kon la famiya, u la sanedad i munchos otros problemas. Por esta kavza, las personas estan pesimistas mas o menos, i keren olvidarsen para pueder kontinuar a bivir las ermozuras de la vida.
Entre semana, una demanyana el telefon sono; i uno de muestros amigos mos bushko en dizyendo ke se eskarinyaron muncho de mozotros i ke mos vaygamos kon eyos a azer un piknik, para pasar un dia entero endjuntos. İ mozotros mos aparejimos alhad demanyana, mos topimos kon tres kuples keridos, entimos, afavles (canayakın), sinseros i lo mas emportante korektos. Veramente, aviya mas de dos mezes ke no mos puidimos ver, i ya mos aviyamos eskarinyado de eyos.
La persona, no es konkriada (yaratılmış) para bivir solo. La natura propozo la unyon, por esta razon; kale avenirse (uyuşmak) kon las personas, i developar esta unyon, devinir amigos i aliados (dost).
La amistad (dostluk) tura kon el adjuntamyento (birliktelik), i se envedrese kon la kerensya (sevgi), i da fruta kon el esforso (çaba).
Si ay kerensya entre las personas; eyos se akordan (anlaşmak) i la amistad nase.
La amistad se realiza entre las personas buenas i vertuozas (erdemli). En la amistad nada no es kon hadras (yapmacık). Todo es verdad, i vyene de aryento del korason.
Enfin, a midi mos fuimos a un kazal ke se yama “Çırçır Suyu” serka de “Sarıyer”; un lugar ke veramente paresiya a un kanton en el paradiso.
Una guerta entre las vedruras, el tyempo puro i limpyo golyendo a las yervas (çimen) freskas, i el kalmo mos repozo de la vida kanseryoza i reboltoneyoza ke tenemos en la sivdad.
Los arvoles kon mil i una tonalidad de la kolor vedre, las ojas ke se engrandesyeron kon las luvyas, las flores, los guesmos (koku) i el trokamyento de la natura, son una egzaltasyon (coşku) para las personas, para ser mas aktivos, alegres i pozitivos.
Kale saver la valor de esta rikeza!
Kuando arivimos, la meza ya estava pronta, komimos, bevimos, avlimos kon muncho plazer i gusto, i dia entero mos gozimos de las ermozuras de la natura en oyendo los pasharos kantar kon sus bozes dulses.
En la natura se puede topar la fuersa de la kerensya. La armonia kon la natura, la armonia kon las personas aseguran la armonia kon el mundo.
La kerensya es la vida, i la vida es el refleto de la kerensya. La rikeza de una persona es en primero la sanedad, i tener mas de dos aliados en el entorno, por pueder bivir orozos.
Fue un dia muy reushido, yeno de kerensya i nostaljiya.
Estar kon muestros aliados endjuntos; aze naser un arko de syelo de kerensya i esto es un privilejyo (imtiyaz) para las personas.
Syempre teneremos amigos i aliados en muestro entorno para pueder bivir kon felisidad (mutluluk).
