Ya vino enverano. Las eskolas se serraron vyernes ultimo. Los elevos ya eskaparon un anyo otro; seya kon alegriya, seya kon tristeza. Estan muy kansados de los egzamenes, i del sistem de la instruksyon (eğitim). Despues de las klasas se estan iyindo a los korsos (kurs), por pueder reushir en los egzamenes para entrar a las eskolas estranjeras i a las universitades buenas.
Ya se muryeron de koryer por aki, por aya, de estudyar, de no durmir, i los paryentes de gastar una moneda loka para ke sus ijos puedan reushir.
El Dyo ke meta veluntad buena a los chikos, a los grandes i al mundo entero.
Agora ay una aktivitad (hareketlilik) grande mas o menos en todas las famiyas.
Los aparejos de iyir a las islas ke son una maraviya de la natura kon las vedruras, las flores, los pasharos i la mar limpya. Todas las mujeres muy kansas de penar i arekojer las kazas de Estambol, para iyirsen i repozarsen. Ma ay una problema muy grande. Los ijos i ijas ke tyenen mas de vente anyos, mas no estan vinyendo a las islas. Las madres tyenen de penujeyar (çalışmak) en las kazas de la sivdad i de la isla.
Ya pensaj ke estamos engrasyados de sus partes !...
Dos kazas avyertas, alimpyar aya i aki, lavar , gizar, dar uti, ordenarlas esta muuuuuuuuy difisil.
Entre las problemas ke ay entre los paises en todo modo de punta de vista, i esto mos esta aminguando el dezeo (arzu) de bivir.
Veramente, el Dyo ke de, parnasa a los ombres, para abasteser a las kozas menesterozas de sus famiyas.
Avlando de los ombres; alhad ultimo se fyesto el dia de los padres.
Los padres devuados (fedakar) para los ijos i la famiya entera. Eyos penan dia entero i se kitan la alma para pueder ganar la moneda ke nesesita la famiya para bivir repozado. Eyos korren semana entera i anyos enteros, para abasteser a lo ke tyene menester toda la famiya. Una persona lavora por kuatro personas anyos i anyos... i solo un dia es la fyesta de eyos !...
Kada dia, kale pensar a eyos, i rogar ke tengan sanedad, i fuersa para korrer, para lavorar i tener repozo.
Si pensamos a los sakrifisyos (fedakarlık) ke azen por mozotros, kale ke los abrasamos (kucaklamak) en el momento ke topamos la okazyon (fırsat bulmak).
Un padre es orozo, kuando sus ijos biven kon felisidad (mutluluk).
La alegriya de una madre i un padre es; de aunar a sus ijos debasho el talamon, echar tallet i verlos kazados i orozos.
Esto es el evenemento el mas emportante i orozo de un padre.
El Dyo ke mos ayege a todos de verlos en este sakro momento.
