Ay kuatro anyos ke Gilad Shalit se topa enkarselado entre kuatro paredes, kuatro anyos de kaptividad, entornado de karas enemigas, de sus krueldad, de sus indjuryas i de sus sarkazmos... Kuatro anyos ke el bive debasho la voluntad de individuos ke gritan alto i huerte para pregonar la eliminasyon de Israel de la karta jeografika, individuos ke avian echado bombas sovre otobuses yenos de ninyos inosentes i proyektiles mortales sovre mansevos Israelyanos a la flor de la edad...
Ay kuatro anyos ke (sovre su propya tyerra, la tyerra de Israel, arrankado a su dever de soldado) un grupo de bandidos lo arrevataron... kuatro anyos de sufriensa, de privasyon, de umilyasyon... kuatro anyos sin apersever la silueta de un amigo ni oir la boz de un kerido ... kuatro anyos sin nada de verdaderamente humano en su entorno, komo enterrado en las tinyevlas de un djenero de agonia prematura.
Ay kuatro anyos enfin ke le arrovaron su libertad i su derecho a la dulsor de la sonriza de su madre i al kudyo afektuozo de su padre, komo tambyen su derecho a la emosyon del primer amor i al sonido de una boz feminina, a todo lo ke aze la real valor de la vida.
En el espasyo de estos kuatros anyos pokas bozes se enaltesyeron para protestar, salvo las Israelyanas, lo ke es komprensivle i tambyen unas kuantas de grandes intelektuales djudyos de la Diaspora komo la de Bernard Henri Levy i de otros eskritores ansi ke de pokos ombres politikos.
La semana pasada el Ministro Britaniko de los “Echos Eksteryores” William Hague demando la liberasyon immedyata i inkondisyonal de Gillad Shalit ., .. El disho ke es esensyal kel Hamas permeta al Komite İnternasyonal de la “Cruz Roja” (kızıl Haç) de ir a verlo i de asegurarse ke esta en buena salud. El afirmo tambyen kel “enkarselamyento de Gillad Shalit, sin ningun kontakto kon el eksteryor ni kon kualkyer myembro de su famiya” es una koza inakseptavle...
De su parte, el Prezidente Nicolas Sarkozy denunsyo la manera de tratar el prizonaryo ke manka totalmente de humanidad i komo syempre egzijo su liberasyon i su retorno al seno de su famiya.
Ma ande estan los grandes tenores de la prensa ke otomatikamente, sin mizmo analizar ni djuzgar el kavzo, protestan kon vehemensya a la mas chika remarka o kritika ke se aze konsernando un Aljeryano o un Marokano... ande estan las institusyones ke se dizen humanitaryas, los ke pretenden ser los defensores de la deklarasyon de los derechos del Ombre?
Deke durante kuatro largos anyos eyos kedaron mas o menos kayados?
