Enkontro de la komunidad djudia de İzmir kon el Ministro Egemen Bağış

La semana pasada el Şalom publiko un artikolo eskrito en lengua Turka muy interesante, sinyado por Rafael Algranati de Izmir, del kual pensimos azer un chiko rezumen en  Djudeo-Espanyol  para muestros lektores  estranjeros ke no entyenden  el idyoma de muestro payis.

Se trata de un enkontro  ke los dirijentes de la Komunidad djudia de Izmir tuvyeron kon el Ministro Egemen Bağış, el kual (de pasaje en esta sivdad) los avia invitado por una entrevista.

Komo es de uzo, el Ministro les demando si tenian una pregunta espesyal a formular. Entonses  el Prezidente Jak Kaya despues de averle dado informasyones sovre las diferentes institusyones i ovras karitativas djudias, le izo saver ke  la Komunidad de Izmir no tenyendo una “Personalidad Judicial”, los dirijentes enkontravan munchas  difikultades en la jerensya de los byenes antiguos komo las Sinagogas ke tyenen una grande importansa historika, ansi ke espiritual i ke malorozamente no egziste una Fundasyon espesyal a este sujeto.

El ministro Egemen le respondyo ke el tenia muy buenas relasyones kon la Komunidad Djudia de Estanbul i ke dezea de mezmo estableser las mezmas kon la kolektividad de Izmir.

En el korso de la konversasyon, el disho tambyen ke los akontesimyentos de Gaza no deven impresyonar los sitizanos djudyos porke las komunidades de otras relijyones ke se topan en Turkia son muy importantes para el payis, lo ke es tambyen la opinyon de Recep Tayyip Erdoğan i de la totalidad del Governo.