Una nave yevando bandyera moldava, alkilada por una asosyasyon Libyana fundada por el ijo de Kadafi, kon un kargamyento supozado responder unikamente a “menesteres domestikos”, partyo dia de alhad de un porto Grego a destinasyon de Gaza, kon el objetivo de romper el blokeo aktual
El governo Israelyano intervino immedyatamente por via diplomatika, demandando ke la dicha nave sea dirijida verso el Ayifto i no verso Gaza, afin de evitar una kualkyer intervensyon de su parte i ansi un muevo insidente .
La Gresya disho ke resivyo la garansia de la parte de la Libia kel kargamyento ira en Ayifto , por kontra un responsavle de la asosyasyon libyana deklaro ke la “inisyativa de ir direktamente a Gaza” sera mentenida.
El Ministro de la Defensa Israelyana Ehud Barak kualifiko esta mueva tentativa de romper el blokeo de Gaza de “provokasyon superflua” i deklaro ke vapores de gerra Israelyanos puedran intervenir en kavzo de nesesidad.
Deke esta mueva provokasyon? La entrada en Gaza de todo modo de produkto nesesaryo al mantenimyento i al uzaje domestiko ya fue permetida poko tyempo despues los tristes eventos del 31 Mayo... Aktualmente se trata de un simple kontrol, lo ke es el derecho de Israel.
La opinyon publika mundyal i la prensa entenderan, lo esperamos, ke ningun governo en el mundo puede tomar el reziko de deshar entrar en el espasyo enemigo “proyektilos mortales ke serviran a matar o ferir sus sivdadinos” partikularmente kuando se trata de un puevlo kontinualmente amenazado de ver su payis eliminado de la karta jeografika.
Ma ay grande probabilidad ke al primer akto de defensa de la parte de Israel , la prensa mundyal empese de muevo a eskrivir “medyas realidades” mas mentirozas i perikolozas ke la mentira eya mizma.
Si.... komo disho Ehud Barak, “asta ande estas provokasyones permanentes?” deke esta inimistad ke parese persigir muestro puevlo desde siglos? asta ande la libertad de la prensa, una libertad sin deontolojia ni ningun kontrol de eya para eya? deklarasyones bazadas munchas vezes sovre la imajinasyon kaprichoza de un korrespondyente ke kere absolutamente ser el primer a anusyar varias novedades , “medyas verdades” oidas o meldadas en el internet, ke kada uno repeta a su torno puede ser sin malisya espesyal, ma ke azen sus lavoro de erozyon i mizmo de derrokio.
Envezes parsyalmente djusta, munchas vezes falsa, la rumor desha kaji syempre trasas de dubyo detras de eya i esto puede destruir el futuro de una persona..
Mozotros djudyos konosemos de serka el efekto derrokador de estas akuzasyones mentirozas bazadas munchas vezes sovre faktos insinyifikantes, repetadas desde 2000 anyos kontra muestro puevlo, transmetidas de siglo a siglo en una atmosfera de sospecho permanente asta atribuirmos rituales sanginaryos inventados sovre simples kalomnias
En el korso de la Historya, personas inosentes muryeron en sirkunstansyas terrivles sovre baza de semejantes prejuisyos falsos....
