Un muevo livro sovre los aktos de heroizmo de los muslumanes en el Holokosto va ser publikdo en estos diyas. Ansi, los nombres de los muslumanes ke se opozaron a la injustisia i defendieron los judios va pasar a la istoria. El nombre de este livro va ser ‘The Role of The Righteous Muslim Persons’, ‘El Rolo de los Muslumanes Justos’. La organizasion ke esta publikando este livro se topa en Londra. El butto de este livro es de aminguar el ekstremizmo i de prokurar la armonia sosyal en la Angleterra. El mundo konose los nombres de muy pokos muslumanes ke se opozaron a la injustisia i ke protejaron los judios en el Holokosto. En este livro se va topar las istorias de las justas personas muslumanas ke fueron gidadas por la kreensia muslumana i por sus proprios dezeos de azer el korekto en protejando i salvando la vida de munchas viktimas. El livro tambien tiene komo objektivo de efasar la enformasion yerrada ke los muslumanes no penaron para defender las komunidades judias en la gerra.
Este livro se va konsantrar a las personas konsideradas komo ‘Los Justos de las Nasiones’ por ke seygan eskritas en Yad Vashem en Yerushalaim, i va kitar en medio el rolo ke djugaron las personas, las famiyas, i las komunidades en los paizes komo Albania, Aljeria, Tunez, Morroko, Turkiya, Korotia, Bosna i Herzojovina.
En Albania, los judios no fueron viktimas de los Nazis por modo de un shifro nasional de onor ke egziste en Albania i ke es nombrado komo ‘Besa’. Besa tiene el objektivo de ayudar a los menesterozos i a los ke son de otro orijin, u de otra relijion.
En el livro, el eskridor tambien konto la istoria de Khaled Mahameed ke es un avokato musluman ke fue el fondador del primer muzeo de Holokosto ke los arabos fondaron. Este muzeo se topa en Nazaret. Este avokato se kreye a la justisia i a la egalidad, i se opoza a todo modo de brutalidad.
Segun Fiyaz Mughad, el editor de este livro, tenemos muncho menester de este livro en estos diyas, porke ay muy pokos dokumentos sovre el rolo ke las komunidades muslumanas djugaron en el Holokosto, i tambien ay munchos artikolos en el internet sovre las nosiones negativas de los muslumanes por el Holokosto.
‘Este livro va amostrar los aktos heroikos de los muslumanes ke salvaron las vidas de los judios en el Holokosto. Estas personas riskaron sus vidas para ayudar a los judios’ esta diziendo Karen Pollok, la direktora de la Fondasion por la Edukasion del Holokosto.
