Komo lo asperavamos, la reaksyon hue fuerte de la parte de nombrozos Ombres politikos i Relijyozos Djudyos, de Israel komo del mundo entero, partikularmente de numerozos Hahamim ortodoksos de los Estados Unidos, ke se revoltaron kontra” la petisyon prekonizando la prohibisyon de vender o alkilar kualkyer domisilyo a no-djudyos”, dokumento diskriminatoryo sinyado inisyalmente por 47 rabbinos i en sigida por munchos otros reponsavles espirituales Israelyanos, eyos ultra ortodoksos.
Este fakto muy atristante vos fue komunikado la semana pasada en esta mizma pajina del Şalom i oy vos kero komunikar las olas de protestasyones i mizmo de indinyasyon ke provoko esta desgrasyada desizyon de Ombres de Ley enfokados en un ekseso de obedyensa kaji fanatika a tekstos antiguos i kadukos.
Ansi komo mo lo ambeza la Prensa Israelyana:
Esta petisyon humilyante enverso no-djudyos, fue severamente kondenada por el Prezidente Shimon Peres i el Primer Ministro Binyamin Netanyahu, i tambyen por nombrozos intelektuales i prerzidentes de varyas asosyasyones karitativas i kulturales ansi ke por Rabbinos ortodoksos, tal Rav Yehuda Gilad, shefe espiritual del kibbuts Lavi, el kual kualifiko este dokumento de “desformasyon del Djudaizmo” .
De mezmo, 235 Universitaryos Israelyanos embiaron una letra de protestasyon al Gran Rabbino de Safed Rav Shmuel Eliyahou.
En la Diaspora, kaji 750 grandes Reprezentantes Relijyozos deklararon klaramente ke esta petisyon fue para eyos un terrivle golpe i ke semejantes aktos son prejudisyavles a los esforsos kumplidos para realsar i azer respektar i amar el Estado de Israel.
Asher Lopatin Rabbino ortodokso de Shikago prechizo: “...todo komo los djudyos pueden instalarsen en ke partida ke sea de la Tyerra Santa, los sivdadinos no-djudyos tambyen pueden de mezmo azerlo. “Diskriminar un sivdadino del Estado de Israel kuala sea su relijyon o su orijen etnika” es semejante a un djenero de odyo i de intoleransya kontra lakuala luchamos afin de prezervar muestra integridad Djudia.
Por seguro ke mozotros ke bivimos en la Diaspora no tenemos el derecho de pronunsyar kualkyer djuzgamyento kontra los ke meten kada dia sus vida en peligro en bivyendo en Israel, portanto malgrado esto tenemos la ovligasyon de dezir a muestros ermanos i ermanas Israelyanos ke esta petisyon no figura en la tradisyon Djudia i puede tener konsekuensas muy graves.”
Munchos se demandan mizmo si una semblavle diskriminasyon no nesesita una aksyon judisyal. Avishay Braverman, ministro kargado de las minoridades interpelo a este sujeto el Ministro de la Djustisya Yaacov Neeman. Ma ninguna aksyon por rasizmo no puede ser echa, visto ke en la petisyon en kestyon no figura, en ningun lugar, el termo “arabo” remplasado syempre por “no-djudyo”, palavra ke no senyala ninguna rasa espesifika.
Segun lo ke meldimos en el “Jerusalempost en français”, el Rabbino de “Or Etzion” parvino a konvenser el Gran Rabbino de Safed Shmouel Eliyahou ke fue uno de los primeros a invokar la Halakha a este sujeto, ke “si no ay ningun temor konsernando la seguridad del payis, nada (no) puede impedir de alkilar moradas a Arabos”, i le demando de firmar una mueva letra rektifikando su deklarasyon presedente.
Este kavzo tal ke evoluo mos ambeza ke “la tentasyon del rasizmo” egzite en ke relijyon ke sea, komo un djenero de fanatizmo al kual algunas personas partisipan o delantre el kual, mizmo si es de avizo kontraryo , la mayoria keda munchas vezes kayada, sin realizar el mal ke su pasividad puede kavzar.
En ke ideolojia ke sea, el ekseso es un djenero de renyegamyento del resto de la Umanidad., un djenero de horrivle egosentrizmo ande todo se limita al solo “mos/mozotros” igualmente repunyante kel “yo” syego i sodro.
“El ekseso en kualkyer kreensa” es enserramyento, refuzo de la vida en komun, refuzo del otro, refuzo partikularmente de estas palavras biblikas sublimas en sus esensya: “Ama tu proksimo komo ti mizmo”. Por seguro ke la koza no es posivle ma a lo manko azeremos un chiko esforso en esta direksyon
P.S.
Kontraryamente a lo ke meldimos la semana pasada, el Rabeno Ovadya Yosef refuzo de sinyar esta petisyon diskriminatorya. Rengrasyo sinsertamente muestro amigo Avram Behar por su rektifikasyon.
