“El 20 de Tevet, oganyo 27 Desembre es el 806 anyo de la muerte de…
Maimonides…”
Moshe (Moises) ben Maymon, konosido komo Maimonides, nasyo el anyo 1135 en Cordoba. Aparteniya a una respektada famiya djudia, teniendo raizes en Yerushalayim de antes la “dispersyon” (dağılma) provokada por el Imperyo Romano. Su padre, Maimon ben Yosef, era djuzgador (yargıç) en el Tribunal Rabiniko de Cordoba.
Moises, desde su chikes, tuvo grande pasyon (tutku) i entereso por los estudyos. Fue syempre apoyado por su padre i tambien por Yosef ben Migas, shefe de la importante eskola Talmudika de Lucena. Apenas teniya 16 anyos, kuando Moises ya era espesyalisto en filozofiya grega i araba. En desparte de ser un famozo pensador, fue tambien eskritor, matematisyen i mediko.
Myentres la Dominasyon Muzulmana, los sujetos de la Andaluziya (Endülüs) konosyeron una illimitada libertad (sınırsız özgürlük) de relijyon. Ma, en 1148 kon la invazyon (istila) de los Almohades, los djudios se toparon frente de dos alternativas: Konversyon al Islamismo o abandonar las tyerras ande biviyan. La famiya Maimon, kontinuo a pratikar en sekreto el judaismo durante 11 anyos. No ay indisyos (kanıt) siguros, no se save si la famiya de Maimonides fue ovligada a konvertirse al Islamismo.
Entervalo, munchos djudios fueron kondenados a muerte, kon erl preteksto de aver kontinuado la pratika de la Fey Ebraika. Entre otros, Rabbi Yehuda ben Shoshan, instruktor de Moises. Sovre esto, la famiya Maimon, realizando el peligro (tehlike) de bivir en estas tyerras, dechidaron de emigrar. En primero pasaron a Fez, sivdad en el Norte de la Afrika (Maroko). Despues de poko tyempo se fueron a Palestina i finalmente a Misraim. Moises ampeso a lavorar komo mediko i gano grande fama. A tal grado ke, el poderozo Sultan Saladin Eyyubi lo nomino (atamak) al posto de “Mediko ofisyel de la korte” (Saray Maiyeti).
Moshe ben Maimon konosido tambien komo el “Rambam”, era un grande eskrivano. Entre sus lavoros literaryos sovresalen (öne çıkmak) dos importantes ovras. La “Mishne Tora” o (la repetisyon de la Ley). Eskrita en ebreo, entre los anyos 1170-1180, es un lavoro de 14 volumes. El sigundo importante lavoro fue eskrito en arabo. Se treslado despues al ebreo komo “More Nevuhim” i tambien a la lingua Latina i diversas otras linguas.
Las “anchas” vizyones de Rambam, provoko kontra el fuerte reaksyones en los medios konservadores (tutucu). A tanto ke, El Rav de Montpellier ordeno de kemar en la Fransia entera el lavoro de Moshe. Portanto, la fama de Maimonides no amenguo. El fue konsiderado i achetado komo el mas grande pensador (düşünür) djudio. Fue tambien una de las bozes de la “Kreensa Tradisyonal Djudia”.
La ovra filozofika de Rambam tresladada al Latin, impresyono los eskrivanos komo Spinoza i Leibniz. En desparte, tiene konsideravle lavoros sovre la Medikeriya. Estos livros forman una partida de la Historia de este ramo de la Sensya.
Moises ben Maymon, el Rambam muryo en Ejipto el 20 de Tevet 1204 a la edad de 69 anyos. Su tomba ke se topa en Israel, en la sivdad de Tiberia, oy en diya es vijitada en tal ke un lugar sakro. La “Unesco” aviya deklarado 1985 komo anyo Mundial de Maimonides, en omenaje a este grande savyo “Universel”.
