El sentro de “GALATA” es un sentro muy riko sovre las ovras istorikas (tarihi eser). De los primeros syeklos fina oy; Galata fue el sentro de komerso, de kultura i de morada para munchos puevlos diversos. Ma malorosamente los trokamyentos de pueder del governo i la ekspropriasyon (istimlak), oy lo ke kedo de esta erensya es kaji 80 ovras istorikas. Unos kuantos se derrokaron, unos medyos derrokados, otros reparados.
Munchas mechkitas (cami), las murayas (surlar) de Galata, el liseo de Kasımpaşa, 6. Daire (la fragua del Kaymakamlık), el otel Pera Palas, la Munisipalidad de Pera (Beyoğlu Belediyesi), el Konsolato Ruso, el Han Armanlı, el Konsolato de Sued (İsveç Konsolosluğu), Frej Apartıman, el Tunel de Pera, La Eskola Okçu Musa, La Sinagoga İtalyana (el Kal de los Frankos), La Eskola Almana, eglisyas, el ospital Sen Jorj, La famosa Torre (kule) de Galata, la Banka Ottomana, La Sinagoga Neve-Shalom, Ashkenaz, El liseo St. Benoit, Çinili Han, la duana De Galata (Galata Gümrüğü), Glorya Han, Petraki Han, la fuente de Tophane, las Eskaleras del Sinyor Kamondo ke sale a Bankalar Caddesi, i munchos otros.
Me esto akodrando de mi chikes ke pasi muy ermozo kon mis paryentes, mi nona, mis tiyos, i tiyas entornada de amor i de kerensya.
Yo nasi en “FREJ HAN” ke era una fragua byen konstruisada, una fragua empozante.
La Sinyora Anjel Frej; era muy elegante. Kuando eya saliya del asansor el parfum kedava kon diyas aryento.
A la entrada del apartamento aviya unas eskaleras anchas de marmol (mermer), blankas i limpyas.
En la entrada del apartamento aviya dos kamaretas. En la una morava el portalero (kapıcı) ke se yamava İbrahim Efendi, uno del dover suyo era de kaminar el perro de Madam Frej. El sigundo portalero se okupava de los echos diversos. Kuando teniyamos una keshidad (şikayet), u una demanda, del telefon enteryor (dahili) bushkavamos a İbrahim Efendi i le diziyamos lo ke keriyamos. Aviya un ordre (düzen) ekstraordinaryo.
En este apartamento moravan 21 lokateres (kiracı)
En kada etaj kuatro famiyas. A parte de los patrones M. Madam Frej todos eran djudyos.
Me esto akodrando de las famiyas; el Doktor Nasi, el dantist Macar, Barokas, Treves, la famiya Leal ke la ija Suzi Leal se izo una mezo-soprano famoza en la Fransya, i el ermano Vili Leal ke paso los anyos de alkavo, bivyo en Barınyurt.
El Doktor Duenyas (z.l.) ke fui yo una de sus primeras hazinas. Las famiyas Kapeluto, Eskenazi, Bensason, Natan, Biçaçi, Orbak, Becer, Mizrahi i Franko.
Antes de Frej Han, el apartamento se yamava “ADA HAN” porke de las kuatro partes se puediya ver diversas vistas de la sivdad.
De una parte Doğruyol i Bankalar caddesi, de la otra parte Büyük Hendek ande se topa el Kal Neve-Shalom, Kuledibi ande se topava el kal Apollon ke se dava las lesones de la Mahazeke Tora.
La tresera partida era de los apartamentos ermozos komo Merkez Apartıman; ande morava el famozo Doktor Uzdil (z.l.), i Altıncı Daire.
İ la kuatrena partida dava al “Haliç” ke era una vista muy ermoza komo un Feneriko.
Mozotros moravamos en el sinken etaj por la parte de “HALİÇ”.
Era una kaza bastante grande. Las kamaretas de echar miravan a la kaleja ande se topava el Kal Apollon, ke se oyiya las uayas (bağırtılı ağlamak) de los paryentes ke yoravan en los funerales (cenazeler), i las bozes ermozas de los ijikos ke saliyan de la orasyon.
En Büyük Hendek; el sinyor Eliya Pardo ke era mersiero; alkilava vistidos para las bodas. İ en Tokatlıyan Han en Pera ay oy en dia, de 40 anyos para aki; el Sinyor “Leon Esim” ke vende vistidos pretos para okazyones diferentes, smokines para las bodas i vistimyentas diversas para los ombres elegantes.
a kontinuar...
