La prensa Israelyana i internasyonal mos ambeza ke, todo en guadrando su posto aktual de Ministro de la Defensa Israelyana, Ehud Barak demisyono del partido sosyalisto del kual el era el prezidente , para formar kon unos kuantos de sus amigos un muevo grupo politiko mas serkano del sentro, ke sera Sionisto i demokratiko, sovre el model del Gabinete de Ben Gourion.
El muevo partido se yamara “Hatzmahout” lo ke sinyifika en Ebreo “İndependensya”.
Ehoud Barak realizara la formasyon de este partido kon la kolavorasyon del viche-prezidente de la Defensa “Matam Vilnai”, del Ministro de la Agrikultura “Shalom Simhon” i de dos otros deputados “Einat Wilf” i “Orit Noked”.
El deklaro ke su objektivo prinsipal es de realizar todo lo ke es bueno i djusto para el Estado de Israel. Segun la Radyo Militar Israelyana, Benyamin Netanyahou ya estava al koryente de la inisyativa de Ehud Barak al alkual el Primer Ministro dyo la palavra ke su posto de Ministro de la Defensa ansi ke los postos respektivos de sus amigos seran mentenidos.
Por kontra, el ministro de los Echos Sosyales “Yitzhak Herzog” anunsyo dia de lunes, su propya inisyativa de demisyonar del Governo.
