Referandose a la refleksyon del grande filozofo Fransez del 17en siglo Blaise Pascal “el Ombre es una kanya, la mas flaka de todas las kanyas, ma una kanya pensante”, Axel Kahn (ombre de Syensya Fransez) mos dize: “mozotros los umanos semos de una lamentavle banalidad biolojika. Sovre el plano jenetiko, la proksimidad del ‘Homo Sapiens’ kon los grandes maymones, partikularmente kon los shimpanzes, es konsideravle (98,7%), portanto solo entre todas las otras kriansas en vida, el tyene la partikularidad de formular kestyones sovre lo ke lo entorna i sovre el mizmo.”
“Este kestyonamyento envezes obsesivo de la kriansa pensante sovre si mizmo i sovre sus aktos” aze en este momento el sujeto de nombrozas diskusyones konsernando un livro ke relata un kavzo ke se paso en Fransya durante la segunda gerra mundyal, ay de esto 65 anyos, “el kavzo Jean jardin” ke obsedo… i obseda syempre su propyo inyeto Alexandre Jardin, eskritor byen konosido, autor de ovras konsideradas muy agradavles a meldar, ma ke para su ultimo livro, eskojo komo tema prinsipal ”la parte de responsabilidad en el entrego de djudyos de Fransya a las autoridades Almanas, de su propyo aguelo, el kual (mizmo si no partisipo aktivamente) kedo kayado sin pronunsyar la mas chika palavra de protestasyon”.
El kavzo en el mizmo es komplekso i ambivalente. El aguelo Jean Jardin era un grande pasifisto ansi ke un fervente nasyonalisto, enemigo mortal del komunizmo, su devosyon ke nunka el renyego por el Marechal Petain i el Primer Ministro Fransez de la epoka Pierre Laval era enorme. El fue prezidente del Gabinete del Primer Ministro, entre el mez de Abril 1942 i el mez de Oktobre 1943, periodo de tyempo ke fue para los djudyos de Fransya uno de los mas terrivles de la okupasyon, en el espasyo del kual, tuvo lugar el drama horrivle del ”Vel d’hiv.” en el mez de djulyo 194 2; evento durante el kual el governo de Vichy no solo ovedesyo a los ordenes de los almanes ma sovrepujo mizmo estos ordenes en mandandoles tambyen ninyos de edad minor ke no figuravan en la lista del enemigo.
Deke Jean Jardin no formulo la mas chika protestasyon? Se puede pensar ke esto devino komo un leitmotiv obsesyonal para su inyeto.
Despues de la gerra, el eks-direktor del gabinete de Laval afirmo kategorikamente su inyoransa absoluta del drama djudyo ke se devia produzir en el Vel-d’hiv. Asta oy en dia, no se topo en los arshivos ningun dokumento komprometante a este sujeto, ke puedra azer supozar su partisipasyon. Portanto munchos historyanos ke estudyaron el kavzo de serka, afirman ke seria muy sorprendente ke, en su kualidad de Director del Gabinete del primer ministro, el pudyera inyorar la preparasyon de una operasyon de una semejante dimension.
Por su defensya, devemos dezir ke la ambiguidad es ainda mas grande kuando se save ke aunke su immensa proksimidad profesyonal i afektiva kon Pierre Laval, el aguelo Jean Jardin nunka rompyo enteramente sus relasyones kon sus vyejos amigos entre los kualos se topavan djudyos ke el ayudo a azer fuyir ahuera de Fransya, entre eyos el historyano “Robert Aron”.
Komo es komprensivle, despues de la gerra las opinyones a este sujeto fueron diverjentes… El primer objetivo del Jeneral de Gaulle a su retorno en Fransya, sostenido por su konsejero Mendes France, era de asegurar lo maksimum de kohezyon posivle en el payis… Ansi (aunke munchos de los ke partisiparon a la triste operasyon del entrego de djudyos a las fuersas enemigas, fueron djuzgados sovre provas de kulpabilidad kriminal) otros vizivlemente manko implikados fueron immedyatamente rehabilitados i liberados, lo ke fue el kavzo de Jean Jardin ke despues la gerra paso una vida prospera ansi ke muy onoravle en su ermoza kaza, i muryo a la edad de mas de 70 anyos en su propyo lecho, entornado de kerensya i de konsidertasyon.
Deke despues de tantos anyos, su inyeto revino sovre este akontesimyento difamante no konfirmado? “Dezeo de restableser la djustisya”, “remorso indirekto” o byen “impulso imperativo de romper el silensyo opako del dubyo....kastigo mas obsesivo ke la verdad kuala ke sea?
En repuesta a una kestyon similar formulada de la parte de un djornalisto, Alexandre Jardin repliko: “para lavar mi ADN”.
Komo disho el ombre de syensya “Axel Kahn”: “El ser humano es de una lamentavle banalidad biolojika, muy serkano de los maymones, i portanto solo el ,entre todas las otras kriansas en vida, tyene la partikularidad de formular kestyones sovre lo ke lo entorna i sovre el mizmo.”
