El 19 de Janviye, noche de mierkoles, la Asosiasion Goztepe Kultur i el Talmud Tora de Caddebostan, aparejaron un Seder de Tu-Bishvat, i selebraron la fiesta de Tu-Bishvat endjuntos en el lokal de la Asosiasion Goztepe Kultur, kon la partisipasion de dosientas i sukuenta miembros de muestra komunidad.
Los miembros del Konsejo de Administrasion de las Sinagogas de Caddebostan i Kadikoy, tambien asistieron a este Seder kon sus mujeres.
El Rabino Yeuda Adoni empeso su deskorso eksprimando su alegriya de asistir a una fiesta selebrada por dos asosiasiones endjuntos, i en unidad: ‘El mes de Shevat es el mes de los ermozos empesijos. En este mes, la natura se esperta, por esta razon se dize ke Tu-Bishvat es el primer diya del anyo muevo de los arvoles. El arvole tiene una grande emportansa en la vida de la persona. Muestra Tora da grande emportansa a los arvoles. İmajinavos un arvole plantado al lado de una agua. La persona kome la fruta de este arvole, se asenta en la sombra del arvole, se refreska i eskansa aya. La persona mira al arvole i dize esta orasion: ‘Todos los arvoles ke vana kreser de ti, ke seygan koma ti’. La sinyifikasion de esta orasion es: ‘La djente buena komo este arvole, ke seygan egzamplio a las otras personas, i ansi ke se forme una mijor komunidad’. Si las raizes de una komunidad son fuertes komo las raizes de los arvoles, dinguna difikultad no los puede destruir’.
Feride Petilon tambien en su deskorso, dio ermozos mesajes de la fiesta a los envitados: ‘Komo lo savemos, oy en el mundo entero, se esta dando muncha emportansa a la agrikultura, la agrikultura ekolojika, i otros konseptos sovre agrikultura. Es de enkantar, kuando pensamos ke la Tora, miles de anyos antes, dio tan grande emportansa a los prodaktos de la tierra. Kada arvole tiene un dover. Komemos la fruta de siertos arvoles, mos asentamos en la sombra de otros, mezmo azemos kuras de la agua del tronko de siertos arvoles. Kada persona, komo kada arvole, nase kon una mision. Los arvoles mos dan lo ke keremos, sin tomar nada en retorno. Tu-Bishvat mos akodra la emportansa de dar sin asperar nada en retorno. Komo los arvoles, muestros padres son muestras raizes, i muestras kreaturas son muestros ramos. Kada madre i padre penan por sus kreaturas, i les dan grande amor en engrandosyendolos. La amor i la esfuersa son el solo alimeto para una relasion’.
En la fiesta Tu-Bishvat, ke es tambien nombrada komo ‘la fiesta de las frutas’, los miembros de la famiya se asentan al entorno de una meza, ande se mete las siete frutas de la tierra santa. Kada fruta se kome duspues ke se melda su Beraha.
En esta noche del Seder de Tu-Bishvat, los miembros de las dos asosiasiones, se asentaron endjuntos en las mezas, komo ke sieran los miembros de una famiya grande.
El Prezidente de la Asosiasion Goztepe Kultur, İzak Petilon, el Prezidente del Talmud Tora de Caddebostan, İzak Babat, el Rabino Yeuda Adoni, i otros envitados , uno a uno, meldaron la Beraha de kada fruta.
Las kreaturas del Talmud Tora de Caddebostan, edukados por Meri Chaban, i por kinze otros madrihes, meldaron teillimes, kantarom kantikas de Tu-Bishvat, i mos transmetieron mesajes de esta fiesta.
A la fin del Seder de Tu-Bishvat, los mansevos de los grupos Efroim i Bogim de la Asosiasion de Goztepe Kultur, kon sus bayles ermozos, fueron admirados por todos los envitados.
Komo sembolo de la fiesta, mos dieron komo regalo, una planta a kada uno.
Por la primera vez este anyo, se selebro la fiesta de Tu-Bishvat por las dos asosiasiones endjuntos, en unidad i en alegriya, debasho del mezmo tejado. Oguramos ke kada fiesta se selebre kon amistad, alegriya i unidad en muestra komunidad, i en todas las komunidades djudiyas del mundo entero.
