La partensya relativamente en dulsor del Prezidente Hüsnü Mubarak, sin verter sangre (ahuere muy raros insidentes) fue inkontestavlemente una viktorya del’dezeo de demokrasia’ anchamente djustifikado del puevlo Ejipsyano, el kual enfin tomo konsyensya de sus derechos, en este mizmo esprito de revendikasyon ke sopla aktualmente sovre el Oriente Medyo.
La Armada del payis, lakuala supo silensyozamente mentener el orden kon la fuersa de su sola prezensya, en abstenyendose de intervenir brutalmente, izo prova de muncha madureza de taktika, i tambyen de un grande espirito pasifiko ke kaji todos los kontestadores respektaron kon deferensya, sin a ningun momente renunsyar a sus demanda de igualidad.
En ke payis del mundo ke sea, ningun trokamyento de rejimen puede ser realizado de una manera duravle, por un solo punyado de ombres i mujeres ke se topan a la kavesa de kualkyer movimyento de protestasyon, si el puevlo el mizmo no lo kere kon ardor i no partisipa voluntaryamente, lo ke fue el kavzo en el payis del Sfenks i de las pyramides.
No savemos ainda lo ke sera el futuro … Por el momento, no se trata de un partido homojeneo en sus konviksyones, ma de una masa konfuza de mansevos i mansevas, de konviksyones i ideales envezes kontraryos los unos a los otros sovre munchos puntos….
Sera muy difisil de koordinar estos koryentes diferentes en sus objetivos, los unos formados de eruditos i individuos muy aklarados, los otros de personas ke malorozamente kedaron enserrados en una vizyon parsyal del mundo aktual, sin ainda tomar enteramente konsyensya de las muevas konsepsyones i de los muevos imperativos del tyempo prezente..
En este momento la Armada aksepto de asumir por un kurto tyempo la karga de un periodo de tranzisyon ande seran echados los jalones de un muevo sistema sosyo/ekonomiko, el kual asegurara la ekidad i la igualidad de derechos entre todas las klasas sosyales. Eya se topa delantre una multitud de mentalidades echas en mizmo tyempo’ de dezeo de adelantamyento’ i simultaneamente’de refuzo de un trokamyento kategoriko del orden establesido antes siglos’ , los unos portadores de perspektivas muevas, los otros refraktaryos a kualkyer modifikasyon irreversivle.
“Meskla de una pluralidad de ideas” por seguro difisil a omojeneizar ma ke, en su varyedad mizma, realsara la kualidad de la desizyon ke sera tomada a la mayoria … munchos sujetos seran diskutidos entre las diferentes fraksyones del puevlo.La Armada (komo fue dicho mas arriva) izo prova de una grande profundura de refleksyon i por seguro eya va tener la sagasidad de retirarse a tyempo.
Barack Obama, ansi kel mundo oksidental, komo tambyen el Prezidente i el Primer Ministro de Israel ekspresaron sus satisfaksyon al sujeto de la aseguransa formulada por las Fuersas Militaryas, kel tratado de paz entre el Ayifto i Israel sera absolutamente mentenido.
La mizma aseguransa fue igualmente formulada, des del primer dia, por el syentifiko Ejipsyano Mohamed El Baradei,ex Direktor jeneral de la Ajensia Internasyonal de la Enerejia Atomika.
