Shmuel Meitar, fondador i direktor de la metoda edukativa ‘Time to Know (primera platforma dijital de ansenyar), partisipo a un evento de NBC New Education Nation en New York, ke tiene komo buto, mejorar la edukasion en la Amerika.
Meitar se topo kon los prensipales ekspertos mondial, en las konferensias, i kompartio kon eyos, ideas sovre la teknolojia de la edukasion en İsrael.
Kon la metoda ‘Time to Know’, estamos remarkando ke los elevos estan mas entuziazmos para ambezar’, disho Meiter.
Meiter servio komo panelisto en el panel ‘Lisyones de Otros Paizes’. Edukatores de los paizes ke estan avansados en este sujeto, prezantaron las novedades sovre la edukasion en sus paizes.
Meitar avlo sovre el eksito de ‘Time to Know’ en İsrael.
‘İsrael se desido de developar un plano nasional para rekonstruir el sistema edukativo del 21’em siglo’ disho Meiter. ‘Nada no puede ramplasar un profesor, ma tenemos menester de mijor enstrumentos edukativos. El mijor lugar de ansenyar i ambezar es por siguro la klasa, ma dainda los profesores no estan ekipadas para realizar el plano del muevo sistema del 21’em siglo. En munchos paizes, dainda ay munchos problemas universal, komo por egzamplio, munchos elevos en una klasa, o pokas pagas de los profesores’.
Los akademikos se reunieron en estas konferensias para diskutar, i topar solusiones para remediar el sistema edukativo. En İsrael, i en los Estados Unidos, los elevos de las eskolas ke estan empleyando la metoda edukativa ‘Time to Know’, estan tomando mas mijores rezultados en matematika i en lingua, ke los elevos de las eskolas tradisionales. Kon esta mueva metoda, la kalidad de la edukasion, la motivasion i el entuziazmo de los elevos esta ogmantando.
‘Esta metoda les esta dando mas muncho entuziazmo a los elevos, los problemas de disiplina estan aminguando, i ansi los profesores se estan puediendo mas muncho fokusar a ansenyar ke a mentener la disiplina en la klasa’ esta diziendo la edukatora amerikana, Dr. Susan Hull.
La metoda edukativa ‘Time to Know’, fue entroduizada en İsrael en el anyo 2007, i en el anyo 2009 en los Estados Unidos.
‘Time to Know’ es un sistema interaktivo kon un platformo dijital de ansenyar, dezinyado espesialamente por las klasas de la komputasion, ‘uno-a-uno’, de oy. Los elevos i el profesor tienen, kada uno, un ordenador portatif.. Utilizando este muevo platformo, los profesores vana pueder ansenyar los elevos del 21’em siglo sin problemas, en empleyando diversos metodes de ansenyar i ambezar, i ansi la performansa de los elevos va ogmantar.
