Fue un dia de sangre i sufriensa, alhad pasado, en la plasa de Taksim, serka de la majestuoza estatua de Atatürk i sus kompanyeros, los ke en 1920 aseguraron al puevlo turko “la libertad” i “la dinyidad”.
32 feridos. Entre eyos: myembros de la polisia prezentes para mentener el orden ansi ke ombres del puevle syempre profundamente atados a los prinsipyos i preseptos del grande Salvador, venidos aya para manifestar sus alegria en este dia de glorya.
Fueron i son ainda oras de lagrimas i sospecho. El atentado no fue asumido por ninguna de las asosyasyones negativas ke malorozamente son aktivas en muestro triste mundo. El PKK afirma kon fuersa no aver perpetrado este akto.
De otra parte, la silueta de Ben Laden se perfila un poko en kada lugar...paketos eksplozivos fueron mandados a varias sinagogas de Shikago, grasyas al Dyo interseptados en kamino, otros de mezmo al Prezidente Sarkozy i a diferentes embashadas Evropeas, tambyen sospechados i kontrolados antes de provokar la muerte de kualkyer persona.
En Irak una eglisya kristyana fue atakada por myembros de un grupo serkano a Alkaida, azyendo numerozas viktimas.
De muevo el espanto, la angusya i el dolyo...de muevo las fuersas del Mal en aktividad para dominar un mundo ke, en su inkoherensya, bushka un kamino en direksyon de la luz, sin syempre pueder toparlo.
