Azer un esforso para entender la vizyon del otro, mirar de eksplikar la muestra, sin nunka impozar i sovre todo nunka abandonar la lucha,
De todos los chikos o grandes akontesimyentos ke se produzyeron estas ultimas semanas, uno de entre eyos me izo muncho pensar: “la chika deklarasyon de Angela Merkel sovre la fayita del multikulturalizmo”
İ komo syempre, la mizma kestyon me vino al tino: “Es ke el multikulturalizmo es posivle en un mundo en derota?” Kreo ke la kestyon azera sonriir mas de una persona, el puevlo djudyo (en su grande mayoria si no en su totalidad) es “en su manera de bivir en la diaspora” la prova tanjible de la posibilidad de un polikulturalizmo armonyozo, sin por esto renunsyar a sus kreensas fundamentales transmetidas de jenerasyon a jenerasyon.
Eternalmente persigido en su egzilyo, el nunka pudo kedar indiferente a lo ke se pasava alrededor. Por prudensya komo tambyen por simple kuryozidad, el se entereso a la manera de bivir de los otros, a sus uzos i kostumbres, todo en savyendo ke no pudia tener la mizma persepsyon de las kozas, ke eyos.
“Multikulturalizmo” no kere dezir integrasyon ni asimilasyon kompleta, ma simplemente “esforso de konoser el otro sin prejuisyo negativo ni dezeo de kerer (koste lo ke koste) konvertirlo a muestras solas kreensas o manera de bivir.
La Sivilizasyon no es un bloke monolitiko, ma (a kondisyon de referarse syempre a una baza etika) una mozaika de valores diferentes ke vyenen kada una del mizmo impulso egzistensyal, valores ke devemos tolerar en lo ke son diferentes de mozotros, komo los otros tambyen deven tolerar las muestras.
Es la razon por lakuala el multikulturalizmo no implika solo una suma de konosensyas filozofikas o linguistikas, ma esensyalmente un djesto verso el “otro”, un simple esforso de entenderlo en sus diferensyas mizmas, komo una ventana avyerta, sin tener el ovligo de renunsyar a muestra vizyon personal para adoptar la ke deskuvrimos en eyos, ni impozarles la muestra, mizmo si eya mos parese ser superyora a la suya. I por esto, el esforso deve ser poli-lateral, el deve venir de las dos partes para ke pueda dar un rezultado pozitivo.
El egzije un dezeo de entendimyento resiproko, la bushkida de un punto komun...”Renunsyar a azer este djesto” es abandonar el kampo de bataya. l esto ninguno tyene el derecho de azer.
En muestro siglo no se puede imajinar una mundyalizasyon sin multikulturalizmo; la vida seria entonses un movimyento en eternal estado de konfuzyon i inkoerenya. Por seguro es difisil i mizmo muy difisil de entender el otro en su diferensya, ma ke esto no mos detenga “pedrer una bataya” no es una fayita... Una fayita es kuando se renunsya a la lucha.
