El lektor esta semana va topar en “El Amaneser” el final del dosye (ke empesi en el No. 68).Izimos un chiko analiz de las relasyones Hispano-Djudias en el 20. i el empesijo del 21. Siglo. Por no tomar el risko de azer yerros meldi o konsulti (fikir almak) bastante lavoros, manaderos. El mas importante (naturalmente para mi) fue el livro de Felipe Torroba B. de Quiros. Lo meldi en inglez, tresladado komo “The Spanish Jews”. No es un romanso. Es un dokumentaryo bastante enteresante, ma de vez en kuando devo atorgar ke tuve difikultad a entender algunas linyas. De sorte ke fui en syertos pasajes ovligada de referarme i a diversos manaderos.
En el final de su lavoro el Sr. de Quiros esta dizyendo: “En 1480 ampesaron los aktos de la Inkizisyon i komo konsekuensa en 1492 el “Edikto de Ekspulsion”. Los djudios abandonaron este pais ande bivieron mas de 20 Siglos. Aktualmente en la sigunda mitad del 20.Siglo ay mas de milyon i medyo de Sefardim esparzidos a traverso el mundo. Avlan un Castellano arkaiko, kantan muestras baladas kon la ansyana savor... En los Balkanes, en Turkiya, en el Oriente, en el Maroko egzisten Komunidades Djudias ke prezervan kon kerensya, kon amor la Lingua, la Kultura, las Tradisiones de las ansyanas Tyerras de sus avuelos...”
Sovre estas palavras del Sr.de Quiros kero avrir una paranteza i komentar un poko. En primero devo prechizar. No se kuando el ampeso a eskrivir su livro. Ma ya se ke fue publikado anyos despues la fin de la Sigunda Gerra Mundial, en 1972. Entervalo de estos 4o anyos ke pasaron, en ke sensyo i komo evoluaron los sentimientos entre Sefardis i la Espanya (o espanyoles)? Esta kestyon i otras las demandi en mi lavoro. Perkuri a tomar repuestas. Naturalmente, entre los propozitos ke meldi o sinti remarki una diferensya de opinyones, una diversidad de puntos de vista i komentaryos enteresantes.
Munchos estan preferando kedar “realistos”por no pareser “septikos”. Ay personas, eskrivanos ke no estan konvensidos por la ora, de la egzistensya de relasyones karinyozas o de un reel “Ideal Espanyol” en el korason de los djudios. I otros, a la kontra, kon romantizmo (por no dizir kon nostaljiya) estan indo a vijitar las ansyanas sivdades Cordoba, Sevilla o Toledo i Granada.... Yo, personalmente no kero de dinguna manera komentar las repuestas de esta djente. Porke asta agora no pensi nunka de pozarme esta kestyon. Deke?...
Antes de todo no era yo tan aryento de este sujeto komo lo so agora (de una manera kaji profesyonal). I nunka analizi mis sentimientos aun ke ya saviya desde mi chikes ke mis ansestros eran vinidos de la Espanya,“arrondjados” komo uzava a dizir mi kerido avuelo (b.m). En 1967, por primera vez izimos un largo viyaje a la Espanya. Vijitimos munchos lugares, avlimos bastante en espanyol (siguro el espanyol muestro!!). Munchos supieron ke semos Sefardi, lo ke no les izo dinguna diferensya!!.. Solamente ke unos se enkantaron de sintirmos avlar este espanyol arkaiko (antik) de antes tantos siglos. Ay safek ke este.. komo ke diga? este komporto (i otros ke no kero kontar aki) me influenso? No se. Ma, reelmente no kero ser negativa.
Pasando los anyos, esto agora pensando. Puede ser ke yo tambien antes 45 anyos no estava dayinda pronta a entender, a saver o a komunikar. I esto agora kuryoza de saver ke seriyan mis sentimientos, mis impresyones (izlenim), mis reaksyones si oy teniya la oportunidad de ir de muevo vijitar la Espanya, las vyejas sivdades komo Toledo, Cordoba i otras? Reelmente no puedo responder oy... Bivir i ver!...
