Kuando meldi en el jurnal la muerte de Ruth Fayon, reelmente tuve un shok, porke este nombre esperto en mi rekuerdos tristes de antes 34 anyos...
Rekuerdos de una trajediya ke chapteo muestra famiya i ke en el 2006 lo relati en ancho komo: “ 11 Agosto 1976- Una trajedia..”.(El Amaneser No 18) Era el atako al avion EL-AL, por terroristos en el Aeroporto de Yeşilköy. Sinko personas de muestra famiya (donde pyedrimos los dos) estavan partyendo a Israel. Akeya tadre me bushkaron del Espital “Çapa”, dizyendo ke en el atako del aeroporto, serkanos miyos estavan gravemente firidos. Pensi ke era una shaka yelada. Portanto, bushkimos el Konsolato Israelyano, ke dayinda no teniyan dingun avizo. En kurto, el atako era reel i djuntos mi ijo, mi marido, de vista mos fuimos al espital.
Entrando a la “urdjensya” (acil) del espital, la vizyon delantre muestros ojos, nunka me la vo olvidar. Ken yorando, ken gritando de dolor, kriaturas, mansevos, nikochiris aryento la sangre. En un kanton los vide a dos de muestros serkanos... A un momento, vide una muchachika firida, espandida enbasho sovre las lajas... Esta vista me revolto, i perkuri a echarla en una sedya djusto al momento ke vide una dama aserkandose en panika i lagrimas... Fue en estas sirkumstensyas trajikas ke konosi Ruth Fayon, la dama en lagrimas ke era la madre de la muchachika, de Ilana Fayon.
Firida gravamente, a Ilana la transportimos a otro espital ande fue operada por el Prof. Kaya Çilingiroğlu. Los diyas sigientes tuve okazyones de avlar kon Ruth Fayon ke disho: “Mos salvimos de la muerte yo i mis tres kriaturas, Bivimos el ginnam. La ora de la eksplozyon, me paresyo peryer el meoyo kuando vide mi ija aryento la sangre, kayer enbasho. Sin mirar al fuego i las balas (mermiler) ke estavan bolando ensima muestras kavesas koryi verso Ilana. Se dezmayo despues de dizirme: “Mama aze atansyon a ti”. Sin la operasyon reushida de la polisiya turka, iva aver un karnaje katliam) en Yeşilköy.”
Para Ruth ke fue una de los pokos sorvivores (hayatta kalan) del ginnam de Auscwitz, era sigunda salvasyon de la muerte. Ma, en 1976, nunka mensyono sus anyos de kaptividad. Asta el diya ke sinti su arrivo a Estambol en Avril 2006, no konosi este epizodyo de su vida. En el fuaye de la eskola, UÖML ande iva avlar, bushki a verla. De vista se akodro de mi. Portanto, komo antes 34 anyos, no kijo ni nombrar el evento de 1976, el sigundo epizodyo trajiko de su vida.
En el kuadro de las aktividades de komemorasyon (anma) del Olokosto, Ruth Fayon fue envitada a Estambol. Eya era una reskapada (hayatta kalmış, kurtulmuş) de Auschwitz. Nasida en Chekoslovakia, estuvo kon su famiya en el kampo Theresienstadt (Terezina) asta el desembre 1943. Despues fueron yevados en kondisyones muy negras, a Auschwitz. Finalmente, myentres ke estavan en el Kampo Bergen-Belsen fueron salvados por las fuersas inglezas. Despues la gerra, retornaron a Prag ma frente la presyon (baskı) komunista, en 1948 emigraron a Israel, ande Ruth konosyo su futuro kompanyon. Kazaron el anyo 1955 en Estambol i bivyeron aki asta 1959. Kontinuaron a bivir en Geneve.
La noche del 27 Avril 2006 en el Amram Auditorium sintyendo la Sra Fayon kontar las desgrasyas ke bivyeron, por primera vez kompletamente entendi el senso profundo del byervo “Empatiya”. Me olvidi del derredor, de la djente i me konsentri solamente a oyirla. Yo lo eskrivi solamente en un chiko paragrafo esto todo ke konto. Otruna koza ke aviya remarkado fue el “sensyo de umor” de Ruth Fayon. Afilu en medyo de una narrasyon trajika o en respondyendo a una pregunta, fue kapavle de meter una nota umoristika (mizahi) a su relato i azermos sonreir. En paz ke repoze, Amen.
