El profesor Dr. Yomtov Garti muryo la semana pasada a la edad de 96 anyos, entornado no solo del amor i kerensya de sus serkanos, ma tambyen del respekto i de la gratitud de una multitud de amigos, kolegas i elevos de varyas relijyones.
Aktivo asta los ultimos dias de su vida, el ensenyo Matematika i Fizika en las klasas terminales de los prestijyozos Liseos “ Galatasaray”,“St.Jeseph “, “Notre Dame de Sion” i si no me yerro “Musevi Lisesi”...i mas tadre en la Universidad “Boğaziçi” . Sus elevos repetan munchas vezes kon glorya ke egziste un teorema matematiko ke yeva el nombre de sus profesor.
Muestra kolektividad pedrio kon su muerte, uno de sus myembros los mas presyozos i los mas novles, simbolo del adelantamyento i figura luminoza en su lucha kontra la inyoransa i el obskurantizmo.
De una grande madurez de pensamyento, kontinualmente en estado de bushkida de la “djusta mezura” en todo modo de koza, el Profesor Yomtov Garti (en su kontakto kon ken ke fuera) era syempre tornado verso su interlokutor, pronto a entenderlo.
El saviya oir kon la mizma atensyon el avlador el mas sofistikado komo tambyen el mas humilde, el ombre aedado komo el adolesente, konvensido ke kada uno yeva en si una verdad dinya de ser oida i ke a un syerto momento todos tyenen la posivilidad de ansenyar una koza a los otros.
Aunke avyerto a todo modo de evolusyon pozitiva, el nunka pedrio de vista lo ke fue el pasado. Kreente sin nunka kaer en el fanatizmo... pedagogo sin rudeza ni osteridad i sovretodo sin pedantizmo, el adorava tambyen riir i azer riir, i en mizmo tyempo bever un vaziko de vino i kontar anekdotas plazyentes.
El era novle en la profundura de sus refleksyones, komo tambyen en su esforso de transmeter a sus elevos el maksimum de su saviduria, novle en su komprensyon del otro komo tambyen en su interes por todo lo ke es humano, por su puevlo i por su komunidad.
Durante largos anyos el avia akseptado de asumir (en el senso total de la palavra) la prezidensya de la komunidad de Kadiköy, i mas tadre fue myembro aktivo del Konsilyo Laiko del Grande Rabinato... syempre kon simplisidad i la sonriza sovre los mushos.
Eramos buenos amigos, lo konosi desde mi leshana ninyes, tomi konsyensya de su egzistensya desde el momento ande tomi konsyensya de mi “ser”...
En lo ke era el Kadiköy de entonses, muestras famiyas eran vezinas i amigas i mas tadre Yomtov Garti fue uno de los mas intimos amigos de mi marido.Tuve ansi la okazyon de oirlo munchas vezes partisipar a debates sovre varyos sujetos....Para el no era solo el aspekto simplemente prezente de un problema o de un evento ke era importante, ma partikularmente lo ke puedra ser su impakto en el futuro.
El mos desho a todos una grande erensya intelektual i tambyen un maraviyozo egzempyo de modestia; su nombre sera syempre eskrito en muestra memorya kon letras luminozas.
A Melanie su kerida mujer, a sus dos ijas Rifka i Şarlot, a sus yernos, inyetos i inyetas la ekspresyon la mas profunda de muestra amistad i muestras kondolensas las mas sinseras.
