Keridos Korelijionarios
Komo ya lo savesh muy bien; siendo ke fiestasmos desde djenerasiones komo el kumpleanyo de nuestra salvasion del esklavadje de Ayifto, “Pesah” en senso espiritual nos sinyefika nuestra sobrepasadura del kativerio a la salvasion, de lo eskuro a la klaridad i de la tristeza a la felisidad.
“Meavdut Leherut, Mişeibud Ligula, Meafela Leor Gadol, Umeevel Leyom Tov.”
Es por esto ke se denomina tambien komo “Zeman Herutenu/Tiempo de nuestra Libertad”
Aparte de esto, “Pesah” mos apregona la primavera komo la renovelasyon de la natura ke siempre se manifesta en mas alto nivel i se denomina komo “Hag Eaviv/Fiesta de la Primavera”. Esto nos enspira de renovelar nuestra personalidad espiritual en todo modo de senso.
Observando por una prespektiva Historika “Pesah” es el empesidjo de una seria de evenementos ke transformaron nuestra cadena kulturala de una etika tradisyonala a una disiplina selestial transmetida asta nuestra djenerasyon.
Por Midjor, “Pesah” es el empesijo de los evenementos ke se finalizaron a arivar a una patria i ser un puevlo de nuestros antepasados lo Hebreos.
En kurto; “Pesah es la fiesta del abandono lo antiguo i lo antiguado, de mundarse de lo negativo, de sakudirse de la inaktividad, de entrar en bushkidades verso el futuro, de mirar al avenir kon esperansans i suhetos nuevos i en fin de empesar a una nueva vida konforme a las kondisiones de la epoka.
Keridos Ermanos
Kreo traer la palavra a los lavoros de reestrukturar la komunidad ke nuestros konsedjeros i miembros de el komite edjekutivo estan luchando todo en rengrasyando i agradesyendo sus lavoros verdadmente abnegados.
Sin entrar en detalyos kero darvos a saver ke esto al koriente de todos los lavoros ke se estan efektuando en este kampo i esto de akordo kon eyos visto ke es nesesario i provechozo por el futuro de nuestra kolektividad todo en yamandovos a adjuntarvos kon mi para sostenerlos i si es posivle de tomar parte en los lavoros.
Keridos Korelijionarios
“Pesah” nos da tambien la oporunidad de edukar nuestros ijos verso nuestra kultura i nuestra fe. Muy siguro ke el pranso de Seder es el medio el mas konvenivle por esto.
El pranso de Seder ordenado en su regla i la Agada ke resitamos tendra lugar en mente de nuestros ninyos komo el medio de apropriarsen nuestra kultura i fe.
Bien siguro ke no devemos mankar de estimularlos a ke frekuentan las sinagogas.
Esto bien siguro ke muy bien profiterash de esta oportunidad.
Todo en rengrasiando i agredesyendo a el Santo i Bendicho El ke nos ayego i este anyo a fiestar el “Pesah”, vos suheto una buena fiesta kon vuestros keridos i amigos i vos bendigo kon todas las bendisiones de la Santa Tora,
Hag Pesah Sameah.
Rav İsak HALEVA / Gran Rabino
