Nada es realmente pedrido
tanto ke keda una koza a topar
Pierre Dac
En unos kuantos dias Pessah i su potensyal de esperansa ke solo el esforso humano puedra realizar... Pessah i su promesa ansi ke su voluntad de libertad... Pessah i el Dekalogo, immortal dokumento ke atesta la grandor de la kriansa pensante en la elaborasyon de un kodigo relijyozo mesklado a un kodigo sosyal, dando ansi al segundo “kaji la mizma importansa imperativa ke al primer”.
Por las horas la promesa esta leshos de ser realizada, el mundo esta syempre en estado de rebuelta, inekstrikavle kaos ande la riza i el yoro, la alegria i la tristesa, la hupa i el serkolyo paresen ser mesklados, eternal enigma de un destino kaprichozo, sometido al dezorden de una evolusyon loka.
Semana despues de semana, kaji en kada kanton del mundo, el mizmo tablo: la revolta i el aborresimyento, la indjustisya i el krimen... Amigo o enemigo, la muerte de un mansevo o de una manseva es “una madre de mas ke esta yorrando”, “un ninyo de mas sin madre o padre”, “una mujer en el dezespero” i sovre todo un grado mas en el odyo i la sanya, komo una espiral infernal, sirkulo visyozo sin fin ni atemo ke parese perpetuarse al infinito.
Una desgrasya es syempre paridera de una mueva desgrasya, una matansina syempre introduze un muevo dezeo de vengansa, tal una korrida loka verso la oskuridad.
Ay de esto solo dos mezes era la esperansa de un Oriente Medyo renovelado, ande el riko komo el prove, el poderozo komo el flako, el ombre komo la mujer tendran los mizmos derechos delantre la ley i la mizma libertad de eskojer sus destino en un espasyo de respekto mutual i de desensya....
Aunke “el solo fakto de demandarlo i de luchar para obtenerlo” es a el solo un paso adelantre, el rezultado no es ainda seguro...
Es ke el ombre del 21em siglo, ken ke sea, kultivado o analfabeto esta pronto a bivir esta evolusyon ansi ke su konsekuensa inevitavle “la mundyalizasyon” kon todo lo ke eya mos impoza de respekto enverso el otro, ansi ke enverso su fey i su kultura?
La mundyalizasyon no es solo una teoria sosyal portadora de esperensa unikamente en el espasyo materyal i komersyal, eya es antes de todo: “Saver akseptar las valores del otro sin por esto ovligatoryamente renunsyar a las suyas”.
La mundyalizasyon no es una erozyon de la kultura de orijen de kualkyer ser humano, ma simplemente una avyertura verso otras kulturas, un djenero de akulturasyon ke no sera un renunsyamyento a la valores propyas a kada individuo ma un enrikisimyento....
