La semana pasada el Prezidente Palestinyano Mahmut Abbas estava en Paris en el eskopo de demandar ayudo a la Fransya afin de ayegar a un ”rekonosimyento ofisyal del Estado palestinyano” de la parte de la Unyon Evropea.
Segun lo ke mos ambezan la Prensa Franseza i el kotidyano elektroniko Israelyano Jerusalem Post, el embashador Fransez serka de la ONU deklaro kel rekonosimyento del Estado Palestinyano es una opsyon a la kuala su payis ansi ke munchos de sus partenaryos Evropeos pensan aktualmente, en el eskopo de krear un orizente politiko ke permetra una reanimasyon de las negosyasyones de Paz entre Israel i el Governo Palestinyano.
De su parte, la responsavle politika de la “Organizasyon de las Nasyones Unidas” (ONU) izo saver ke “mezuras desizivas i odasyozas son absolutamente nesesaryas afin de rezolver este konflikto largo de unas kuantas dekadas”, lo ke fue konfirmado por nombrozos delegados de varyos paizes, referandosen al raporto Goldston, ansi ke a los ultimos eventos en Gaza.
La embashadrisa de los Estados Unidos “Susan Rice” tambyen, insistyo sovre el fakto ke las negosyasyones entre los dos payizes son el solo kamino para estableser la Paz en la rejyon, en deklarando igualmente ke los Estados Unidos (todo en “no akseptando” la lejitimidad de las konstruksyones Israelyanas en los territoryos okupados) son profundamente preokupados por los tiros de roketas sovre sivdades Israelyanas.”No ay ninguna justifikasyon para travar sovre siviles inosentes” fue su argumento mayor.
Eya de mezmo konkluo ke a la luz de las ultimas deklarasyones de Richard Goldstone a propozito de los paragrafos yerrados de su raporto, las Nasyones Unidas deven meter fin a sus aksyones en relasyon kon este dokumento.
Vinyendo a “Meron Ruben” embashador Israelyano serka de la “Organizasyon de las Nasyones Unidas”, el indiko ke los resyentes akontesimyentos en Gaza konstituen un egzempyo byen klaro de la amenaza ke reprezentan los terroristos i sus kapos, los kualos (kon una insensibilidad absoluta) atakan voluntaryamente siviles i mizmo ninyos.
El deklaro ke desde el prinsipyo del mez de Marso, el Hamas i otros grupos semejantes tiraron “92 roketas” i “141 obus” en el sud de Israel. Tambyen, referandose al resyente asalto sovre un otobus de eskolaryos ke kosto la vida a un adolesente aedado de 16 anyos, el disho: “demando a mis kolegas ke se topan al torno de esta meza lo ke eyos resintiran si un misil de fuerte kalibro es tirado sovre un semejante otobus, en Manhatan o Bruklin?.
En desparte de esto, el evoko el trafiko de armas en direksyon de Gaza, lo ke mete ainda mas la populasyon Israelyana debasho un peligro kontinual.
A la luz de todos estos kambyos de argumentos al seno de la mas grande Institusyon mundyal, no puedemos detenermos de formular la kestyon sigyente: “ke sera la opsyon de Israel? “El se topa delantre dos kaminos diferentes, todos los dos tyenen sus potensyal de peligro i tambyen de esperansa ... el uno mas temeraryo kon su enorme kuantidad de humanizmo, el otro mas akavidozo en su ezitasyon.
Es ke “las armas kon sus kortejyos de odyo i de dolyo” konstituen una solusyon? No mos olvidaremos ke en un “proseso de paz” una de las dos partes deve azer el primer paso.
Djueves pasado, en Tel-Aviv, uvo un grande duelo de opinyones kontraryas a este sujeto... meldi en el kotidyano elektroniko fransez “Liberation” ke munchos intelektuales Israelyanos sinyaron una petisyon demandando la kreasyon de un “Estado Palestinyano independyente”; entre eyos avia aproksimativamente 15 figuras selebres ke resivyeron el prestijyozo premyo “Israel”, rekompensa atribuida kada anyo a los mijores syentifikos i artistos del payis
El Profesor de Syensyas Poitikas Zeev Sternhell disho: “La kreasyon de un Estado Palestinyano es natural. Esto kale ke se realize afin de asegurar la egzistensya de Israel i de evitar ke los djudyos devengan una minoridad en un grande Estado binasyonal”
Momentos difisiles de desizyon para Israel, fuerte en su armada i sovre todo fuerte en su potensyal syentifiko i en su kapachidad de djuzgamyento.
“Ay un tyempo para la gerra i un tyempo para la paz” avia dicho el Rey Salomon.
