Lunes el 2 mayo komemorimos todos (los unos individualmente, solos en sus meditasyon, los otros kolektivamente en komunyon kon otros djudyos) el rekuerdo de los ke fueron arrankados a la vida de una manera kriminal durante la segunda gerra mundyal, entre los kualos vyejos, ninyos i mizmo rezin nasidos...
Ay de esto 60 anyos, el djesto kriminal del partido nazi fue perpetrado voluntaryamento, sin motivo, no en un momento de sanya o de ravya loka, ma en el kalmo, despues de aver byen pensado i diskutido entre partenaryos, segun un proyekto aparejado sistematikamente, kon grande minusia, en perfekta konsyensya i voluntad de la horor del akto…
La komemorasyon de las viktimas de la Shoah devino kaji un segundo teshabeav... de una amargura puedeser ainda mas virulente kel primer... mas grave ke la inkizisyon; komo lo disho de una manera muy pertinente Yakub Barokas, en su editoryal de la semana pasada, sin mizmo el rekorso posivle a la opsyon de una falsa konversyon afin de salvar su vida, lo ke no sera “renyegamyento” ma unikamente “voluntad de bivir”.
No es solo el Djudaizmo kel nazizmo kijo arrankar del raiz por syempre, ma el ombre en su kualidad de kriansa sensible i pensante, el ombre en su humanidad.
El nazizmo fue un djenero de paranoya indomptable kon su pretensyon de ser el simbolo de una rasa superyor i kon su voluntad de erradikar de la superfisia de la tyerra, todo lo ke puedria ser un entrompeso a la afirmasyon de su supremasia; el nazizmo fue un djenero de desdenyo i mizmo de odyo del otro i de todo lo ke era diferente de su kreensya.
Es ansi ke (en el objektivo de asegurar la perenidad del puevlo Djudyo) el “dia de la Shoah” deve kedar al enfinito en la konsyensya de kada uno de entre mozotros, dia de rekuerdo no solo para mozotros ke bivimos en una epoka ande miles i miles de kozas atestan la horor del jenosidyo, ma sovre todo para el leshano futuro, para los ijos de muestros ijos, sus inyetos i bis-inyetos.
Es una vedrad ke todo ya fue dicho a este sujeto. Malgrado esto, sean lo ke sean las sirkunstansyas, kada anyo devemos kumplir de muevo la mizma seremonia, komo un ritual de respekto enverso las viktimas de una indjustisya monstruoza. Kada anyo devemos komemorar los muertos de muestro puevlo, sin odyo ni esprito de vengansa ma kon fidelidad i devosyon.
