Segun lo ke mos dize la Prensa mundyal: Despues una larga bushkida i un akoso de 10 anyos, durante la noche entre Alhad i Lunes, “Usama Ben Laden” fue enfin topado i matado en un foburgo Pakistanezo, a proksimidad de una akademia militar, eskondido en una rezidensya privada entornada de paredes altas de 5 metros, ande no se topava ni telefon ni İnternet. El fue el autor de multiples aktos kriminales, entre los kualos la destruisyon de la dos torres del World Trade Center de New-York, lo ke avia kavzado la muerte de 3000 personas.
Komo se entyende byen, la operasyon militarya de los Estados Unidos fue egzekutida en un absoluto sekreto, al konosimyento solo de un punyado de komandos Amerikanos, i tambyen kon una grande minusia afin de no kavzar la muerte de ninyos o mujeres ke puedian toparsen en la mizma morada.
Ben Laden el mizmo, uno de sus ijos i dos de sus ermanos ansi ke sus mensajeros i una mujer ke fue utilizada komo eskudo toparon la muerte.
El Governo Pakistanezo konfirmo el asalto dirijido eksklusivamente por fuersas Amerikanas, konformamente a la palavra dada por el Governo de Washington a su puevlo, de apanyar muerto o bivo el monstre en ke lugar del mundo ke sea .
Es poko probable ke esta muerte puedra salvar la Humanidad del mal terrivle ke es el terrorizmo... el fue transmetido durante largos anyos a diferentes dishiplos... El Djihad no muryo i es malorozamente posivle ke aktos de vengansa sean perpetrados ... ma “la djustisya devia ser echa i lo fue...”
El Jerusalem Post elektroniko, versyon Franseza, mos ambeza ke munchos dirijentes internasyonales afirmaron sus satisfaksyon al anunsyo de la muerte de Benladen. Entre eyos, el Governo Fransez ke saludo la tenasidad de los Estados Unidos en su bushkida i su perpetual akoso.
De su parte, el Sekretaryo Jeneral del OTAN kualifiko la misyon Amerikana de “Reushita sinyifikativa”.
Binyamin Netanyahu disho ke “la Djustisya, la Libertad i las Grandes Valores de las Nasyones demokratikas triumfaron kontra el terrorizmo”.
Shimon Peres tambyen konsidero la aksyon Amerikana komo un kumplimyento en favor de la sivilizasyon i del adelantamyento de las grandes ideas humanas.
Vinyendo a Tzipi Livni, eya deklaro ke “Israel es un partenaryo del Mundo libre, en su kombate kontra el terrorizmo”.
En efekto “la lucha es grande kontra el obskurantizmo i la indjustisya”, ma desgrasyadamente el risko persiste syempre de aktos de terrorizmo, puede ser mizmo ainda mas intensifikados por el sentimyento de vengansa.
