Es ansi del ombre en su destino insyerto, humilyasyon i oprobo despues de aver ayegado al punto el mas alto de la glorya.
Desde Shabat despues de medyo dia, un djenero de “sonyo malo”, invresemblable en su sinyifikasyon i imprevizivle en su realizasyon... un sonyo malo sin konsistensya espesyal, parese abatirse sovre un ombre... Se trata de un kavzo aberrante i mizmo inkonsevivle en su esensya i su estruktura.
Por ke razon Straus Khan ke es konsiderado komo uno de los ombres los mas intelijentes i byen pensantes del mundo, perpetro un akto semejante, prezentado en su forma la mas bestyal.
Es ke se trata de una simple kalomnia, de una konspirasyon o de una vulgar trampa ke le fue tendida en el objetivo de meter fin a su briyante karera profesyonal? O byen, lo mas terrivle, eske el fakto es real? Es ke realmente el agreso seksualmente una de las empyegadas del hotel ande el se topava?
El no aksepto de deklararse kulpavle, lo ke puedia fasilitar su liberasyon provizorya kontra garantia.
İ, lunes demanyana en kaji kada kotidyano se vido la inyovle fotografia mostrando el prerzidente del F.M.I. Dominique Strauss Khan, las manos atadas detras la espalda komo un grande kriminal o un bandido de kampos…
Esta fotografia es una verguensa... verguensa para el mundo oksidental ke pretende ser sivilizado... verguensa para la prensa avida de novedades sensasyonales... verguensa para la Djustisya Amerikana ke humilyo ansi un prezumido kulpavle.
Deke derecho arrebashar un inkulpado ke no fue ainda ni oido ni djuzgado?
Deke derecho kondenar sin aver echo una verdadera enkuesta?
No digo esto solamente por ke se trata de Strauss Khan, el kual es uno de los mas grandes ekonomistos del mundo; esto lo digo por todos, por los akuzados rikos i poderozos komo por los akuzados proves, por los oksidentales i igualmente los azyatikos o byen los afrikanos...
Por seguro ke todos deven pagar el presyo de sus falta, ma ninguno deve ser humilyado.
İnnosente o kulpavle, el prezidente del F.M.I. es uno de entre eyos, un ombre kon su dinyidad, su orgolyo, su fuersa komo tambyen su debilidad, un ombre ke se pudo yerrar komo kada uno de entre mozotros lo puedemos... Ainda nada fue provado, todo repoza sovre la deklarasyon de una mujer ke le era deskonosida, sin testigo ni prova tanjible irrefutavle.
Ke sera de Dominique Strauss Kahn en el futuro? Por las horas el orizonte parese oskuro, muy oskuro... Falsas o djustas akuzasyones ke datan de 10 o 15 anyos antes, se mesklan a la prezente, la kuala (lo repeto) no fue ainda akseptada por el inkulpado..
Tengo meldado, ay de esto unos kuantos anyos, ke en la djustisya Biblika no egzistia “rejistros de antesedentes penales”, kada kavzo era djuzgado separado, i una vez ke el kastigo desidido por los djuzgos era kumplido, el kulpante salia la kavesa alta, libre de eskojer un muevo kamino en la vida.
La verdadera djustisya es esto: kastigar si es nesesaryo i meresido, ma nunka arrebashar, nunka destruir el futuro de una persona…
No mos olvidaremos ke los Estados Unidos son muy puritanos. Al kontraryo de los uzos i kostumbres juridikos Fransezes, el kodigo penal Amerikano es muy duro por todo lo ke konserna los delitos seksuales, muncho mas envezes ke por los delitos finansyeros. El solo djesto de kerer aserkarse mas intimamente de una mujer es konsidero komo una agresyon.
