“No vo abandonar el kampo de la paz.” Shimon Peres
Martes la noche de la semana pasada, oyimos en varyos postos de televizyon, la enorme i unanima ovasyon echa al diskorso ke Benyamin Netanyahu pronunsyo delantre las dos Kamaras reunidas “el Senato” i el” Kongreso” de los Estados Unidos..
Republikanos i Demokrates konfundidos en un mizmo entuzyasmo aplodyeron, munchas vezes en pyes, konfirmando ansi sus aprobasyon i la profunda amistad ke los dirijentes Amerikanos syenten por la miniskula parsela de tyerra ande se refujyaron mujeres i ombres persigidos durante largos siglos por el odyo i la sanya .
Por kontra en Israel, la reaksyon fue diferente, las kritikas fueron duras de la parte de munchos sosyaslistos komo tambyen, por razones kontraryas, de parte de los ultra ortodoksos.
De otra vanda, Shabat, el 26 del mez de Mayo, kaji todos los postos de Televizyon anunsyaron la avyertura de la puerta ke avia kedado serrada durante un largo tyempo entre el Ayifto i Gaza , lo ke va permeter la libre sirkulasyon no solo de komanya o materyal sanitaryo, ma tambyen de armas de varias provenansyas.
Para Israel la amenasa es muy grande... i mas grandes tambyen son: “el reselo” ansi ke “los riskos de konflikto entre las dos partes de la frontyera”.
Ay de esto unos kuantos dias, la gazeta elektronika “Jerusalem Post en français” publiko a propozito de una Paz “posivle o no posivle” kon los palestinyanos, el relato de una entrevista ke uno de sus djornalistos izo kon Shimon Peres a la okazyon del 63’em aniversaryo del Estado de Israel.
Aedado de 87 anyos, syempre byen pensante, el esprito klaro, i sovre todo riko del profundo humanizmo ke lo karakteriza, el Prezidente del Estado Israelyano, guadra syempre la mizma esperansa en la posibilidad de un tratado de paz , a la kondisyon (byen entendido) de sakrifisyos bi-laterales....
Devo konfesar ke este relato me konforto muncho; aunke vyejo de kaji 15 dias, el guadra syempre su karakter de aktualidad, i senti en mi el dezeo intenso de partajar mis sentimyentos kon los lektores del Shalom.. Ansi, topandome delantre un teksto muy largo, pensi darvos en dos vezes (esta semana i la semana venidera) la traduksyon en Jud.-Esp.de los paragrafos ke me paresen ser los mas importantes; lo ke empeso a azer debasho estas linyas:
Jer. Post: komo konsiderash la rekonsilyasyon entre el Hamas i el Fatah? Es ke se trata de “una oportunidad” o byen de “la fin de una esperansa”? Eske es de la parte de Mahmud Abbas una trahisyon a todas las promesas del pasado?
Sh. Peres: No es ni el uno, ni el otro. Esto es komo un djenero de ponte temporaryo. Abbas pretende ke el fakto de formular kritikas al sujeto de esta rekonsilyasyon es komo un djenero de injerensya en los echos interyores de los Palestinyanos.
Segun mi, en prinsipyo, es bueno ke los Palestinyanos sean unidos.En todo kavzo, si mos opozamos a esta inisyativa no es por mesklarmos en las kestyones internas de muestros vezinos, ma por kavza de muestro propyo espanto sekuritaryo .
Si se tratava simplemente de una kestyon interyor Palestinyana, no ivamos intervenir, ma el Hamas reprezenta un faktor de insertidumbre, sus armas estan tornadas verso mozotros. Por konsekuensa demandamos ke las kondisyones enunsyadas por el “Kuartet” sean enteramente respektadas.
De otra parte, la desizyon de demandar a la ONU “un rekonosimyento Ofisyal Internasyonal”, sin responder a las “inkyetudes de seguridad Israelyanas” no servira ke a prolungar ainda mas el konflito.
Jer.Post: Es ke konsiderash syempre Abbas komo un partenaryo?
Sh. Peres: Absolutamente si.
Jer.Post.- Mizmo despues su asosyasyon a un grupo ke dezea muestra destruksyon?
Sh. Peres: Para mi, Abbas es un partenaryo ke dezea organizar negosyasyones de paz kon Israel. El es kontra la violensya i kere la paz. Esto no kere dezir ke estamos de akordo sovre todo, ma estos dos puntos son de una importansya esensyal.
El fakto de tomar la inisyativa kritikavle, i ke es importante de kritikar, no me empide de kerer avlar kon el. Las negosyasyones de Oslo mos ofresyeron dos kozas:
a) un partido de la paz en el kampo palestinyano
No tengo la intisyon de tornar la espalda al “kampo de la Paz Palestinyano”, mizmo si envezes lo kritiko.
Jer.Post: Ay poko tyempo, el primer ministro estava en Evropa; en unos kuantos dias, el ira a los Estados Unidos... Kualas son las kozas ke el devra dezir en sus diskorsos ?
Sh.Peres: Lo importante es de insistir ke los ke redaktaron las kondisyones del Kuartet, se aseguren kontinualmente ke eyas son aplikadas.
Jer. Post: Es ke no deve insistir sovre “el kuadro de los dos Estados”? eksplikar por egzempyo los menesteres sekuritaryos İsraelyanos? los lugares ke deven kedar debasho del kontrol de Israel? Sin un verdadero plano Israelyano, es ke no ay el reziko ke mos impongan (zorla kabul etirmek) sus solusyones .?
Sh. Peres: Por seguro ke deve azer todo esto. Ma todo vyene en su tyempo. Durante negosyasyones ay syempre pozisyones “de avyertura” i de “klotura” . En las pozisyones de avyertura, ninguna de las dos partes no kere ser la primera a azer konsesyones . Es despues, ke se estudya lo ke es realmente esensyal. En este momento estamos syempre al nivel de “avyertura” i devemos refleksyonar sovre el nivel operatoryo..Kale desidir des del prinsipyo lo ke keremos obtener a la fin. Algunos dizen ke no keren de un Estado Palestinyano, entonses ke es la otra alternativa? Un solo Estado del kual la natura sera determinada por la mayoria?
Jer.Post: La mas parte de Israelyanos son favoravles a la kreasyon de un Estado Palestinyano porke pensan ke es un imperativo Djudyo.
Sh.Peres: Ekselente . Si tal es el kavzo, kale azer de tala manera ke esto se produzga en los faktos.
Jer. Post.: Ma kale un partenaryo.
Sh. Peres: Ya tenemos uno, malgrado todos los dezakordos ke ay entre mozotros.
Jer. Post: Abbas no se desplasa, mizmo por una negosyasyon. El demanda una total interrumpsyon de las implantasyones i agora el konkluo un akordo kon el Hamas. Los Israelyanos, mizmo los mas moderados, tyenen dubyos sovre sus verdaderas intisyones.
Sh. Peres: El dubyo no es una politika, el es un djugo. Ma kale tomar pozisyon. Dizeremos ke tenesh razon, entonses ke es la otra alternativa? La dezesperansa? “Meter fin a las negosyasyones” no es una alternativa. Si metemos fin al procheso de paz, eyos van a kontinuar sin mozotros, sin mizmo oyirmos en kavzo ande avra kozas sovre laskualas no semos de akordo..
a kontinuar...
