‘No se demanda a un hazino ni su pais de orijin, ni su relijion. Solo esto se dize:’Tienes dolor? Te va ayudar’ – Pasteur
Estos biervos ke estan eskritos en la entrada del edifisio de Or-Ahaim, reflektan la opinion de muestro opital.
La istoria de Or-Ahaim empesa en los anyos dalkavo del dizimuevien siglo, en el mandato de Sultan Abdulhamit II. El opital fue fondado kon los esfuersos de unos kuantos filantropistos para prokurar ayuda medikal a los hazinos menesterozos.
Or-Ahaim empeso komo una chika kaza klinika, kon las kontribusiones de doktores idealistos i de filantropistos. Uno de estos doktores idealistos era el doktor de Atatürk, Dr. Samuel Abrevaya Marmaralı.
En los diyas de la Primera Gerra Mondial, Or-Ahaim avyo sus puertas a todos los hazinos sin diskriminasyon de relijion, o de rasa. Malgrado todas las difikultades del tiempo de la gerra, todos los soldados firridos fueron kurados.
Or-Ahaim, kon grande sakrifisios de los volontarios de la komunitad, kontinuo su ayuda medikal en la Segunda Gerra Mondial, en la Gerra de los Balkanes, en la okupasion de Estambol, i en diversas emigrasiones.
En el anyo 2010, Or-Ahaim selebro el sienidodjen aniversario. Munchos emportantes progresos tuvieron lugar desde la fondasion del opital. Ma, las mas grandes inovasiones fueron echas en los anyos dalkavo.
En el anyo 2005, un muevo edifisio fue konstruido en lugar del viejo edifisio ke fue derrokado. Oy, el opital tiene una Klinika de Geriatria ke es uno de los pokos en la Turkiya. En el anyo 2006, el Sentro de Terapia Fizika, i de Rehabilitasion empeso su servisio ekipado kon modernos ekipos de doktores. En el anyo 2007, munchas muevas inovasiones entraron en vida. El opital se konvertio en un opital mas preferado, ande los hazinos estan resiviendo un mijor servisio, i estan mijor kurados. Las Salas de Shirurjia, el Sentro de Maternidad, i la Klinika Dental tambien entraron en servisio en los anyos dalkavo. En el empesijo del anyo 2010, muevas unidades (Rezonansia Magnetika, Tomografi Komputarizada, Kardiolojia, Shirurjia de Serebro, Shirurjia Plastika, i Shirurjia İnfantil) fueron aviertas.
Muestro opital tiene akuerdos kon İnstituos de Seguridad Sosial, i kon munchas Kompanias de Seguridad Privada, i prokura serivisios a munchos hazinos ke no tienen dinguna seguridad medikal.
Un ekipo de sesenta volontarias, ‘Pembe Melekler’ (Los Anjelos de Roza), lavoran en el opital para reaktivar la alegriya de la vida de los hazinos. Estas volontarias ke toman korsos de enfermeria i de geriatria, se okupan de los menesteres de los hazinos, i azen diversas terapias a los viejos para ke se sientan atados a la vida.
Los ke prefaran sirkonsidar sus kreaturas en un opital, estan aziendo mezmo la selebrasion de sirkonsision en la Sinagoga del opital, i estan fiestando esta alegriya en la ermoza guerta de Or-Ahaim ke fue ambelisada en los diyas dalkavo.
Por todas estas inovasiones, devemos de remersiar Elio Medina i su ekipo laboriozo por sus esfursos i sus sakrifisios volontarios. Este ekipo de volontarios, i los mijores doktores de muestra komunidad i de muestra sivdad, estan aziendo todos sus puederes para rezolvar todo modo de problemas de salud de la institusion, i de los hazinos.
Kon el apoyo de muestra komunidad, Or-Ahaim, de diya en diya, se va ir mas adelantre, se va azer uno de los mijores opitales de Estambol, i va kontinuar a dar servisio a todos los hazinos de muestro pais, en los siglos vinideros.
