Segunda partida de la entrevista del “Jerusalem Post” kon “Shimon Peres”

Sh. Peres: Los Amerikanos keren ke la Paz sea konkluida entre mozotros i los Palestinyanos. Eyos sostyenen la kreasyon de un Estado Palestinyano, ma kontinuan a defender los intereses sekuritaryos de Israel . Ay una simetria.

El Prezidente Amerikano dize ke tanto ke el sera prezidente, la seguridad de Israel sera una de sus prioridades. İ tambyen  dize ke no tyene la intisyon de impozar la paz: “La paz no puede ser impozada, la paz deve ser el rezultado de un akordo, si parvenish a metervos de akordo sovre vuestras pozisyones de avyertura i a organizar negosyasyones seryozas, entonses so kon vos”.

 Jer.Post: Es ke puedesh guarantir  ke este prezidente es un verdadero amigo de Israel?                 

Sh. Peres: Si. El tomo unas kuantas  desizyones difisiles, komo por egzempyo: Su veto en el Konsilyo de Seguridad al sujeto de las implantasyones, laskualas van portanto kontra sus propyas opinyones. El Konsilyo de Seguridad keria kondenarlas i el salyo kontra esta desizyon. 

Jer.Post: Eske el Prezidente Obama pensa a un Israel mas aya ke las frontyeras de 1967?

Sh. Peres: Ay una diferensya entre las linyas de 1967 i el territoryo de 1967. Si avlash del territoryo, los Arabos ya akseptaron ke guadremos algunos lugares  (adriento de los kualos se topan los grandes blokes de implantasyones) a la kondisyon de resivir una kompensasyon en retorno. El (Obama) no se opoza a esto.

Jer.Post:- Puede ser devremos rekonoser un Estado Palestinyano  durante la asemblea jeneral de la ONU en septembre?

Sh. Peres:  So favorable a esto, a kondisyon ke los palestinyanos rekonoskan los menesteres sekuritaryos de Israel. Ay dos kozas a konsiderar “Un estado Palestinyano” i “Las nesesidades sekuritaryas Israelyanas”.

 Es insufizyente de “avlar unikamente des los intereses Israelyanos”  komo tambyen es imposivle de “konsentrarmos solo sovre un  Estado Palestinyano”. Si azemos las kozas a mitad, el konflikto kontinuara...

Es lo ke ekspliki al sekretaryo Jeneral de la ONU (Ban Ki-Moon) al kual  dishe.”Dezeash tomar una desizyon al sujeto de un Estado Palestinyano, ma es ke puedesh meter fin al terrorizmo? Es ke puedesh  azer kayar los tiros i las insitasyones? Un Estado Palestinyano sera kreado i todo esta kontinuara? Sin Paz? Es ke es esto ke keresh?.

Jer.Post: Kuando remarkash todos los trokamyentos ke se estan produzyendo en el mundo Arabo, es ke vesh la posivilidad de un efekto pozitivo sovre las relasyones entre İsrael i los payizes konsernados?

Sh. Peres: No avemos kreado esta situasyon, dunke prefero deshar pasar el tyempo para ver. Yo asperava estos eventos desde un largo tyempo . Los responsavles de estos solevantamyentos saven muy byen “lo ke no keren”, ma ainda no saven “lo ke keren”. Se trata de la primera revolta en el mundo “sin ideolojia” i “sin un  giador jeneral”. Eya fue totalmente espontanea, eya empeso por verdaderas razones:”la represyon”, “la korrupsyon”, i ”la deziluzyon del mundo Arabo”. La Manseves (la muchaches) se solevanto kon el ayudo de los muevos medyos de komunikasyon........No keremos por seguro kel puevlo Ejipsyano biva en la provedad i la umilyasyon.

Jer.Post: Es ke avlatesh kon Hosni Mubarak despues la dekadensya de su governo?

Sh. Peres: No

Jer.Post: Lo aviash sostenido.

Sh. Peres: Ekspresi mi opinyon. No penso ke lo puedre ayudar en telefonandole en este momento. La situasyon es ainda muy sensivle.

Jer.Post: Komo pensash ke esto todo va terminar?

Sh. Peres: Ay dos posibilidades. O  el Mundo Arabo kayera en un djenero de ”tribalizmo”  (organizasyon sosyal bazada sovre las reglas del trivo) O byen el entrara enfin en el 21em siglo. No ay una opsyon intermedyara....

Jer.Post:  İ del  punto de vista İsraelyano?

Sh. Peres: Penso ke deven segir el kamino demokratiko i entrar byen entendido  en el 21em  siglo. No semos desmeoyados. El Djudaizmo es fundado sovre el prinsipyo ke todos los ombres fueron kreados al imajen de Dyo. Muestras valores (etikas i humanitaryas) deven ser mas fuertes ke las politikas. Eyas son valores fundamentales

Jer.Post: Ke es vuestro avizo sovre la Suria?

Sh. Peres: Penso la mizma koza. La famia Assad izo de la Suria una kolonia. Eya kreo una armada Alaouita. Oy, el payis esta prove, su shifro de shomaje (no-empleo) es muy alto, eya no tyene agua. De otra parte la populasyon kontinua a pujar i las entradas monetaryas amenguan..Esto me atrista ; en el 21em siglo es imposivle de adelantar kon metodos de agrikultura i  modos de bivir de un otro tyempo. Aya i en el resto del Mundo Arabo, las mujeres biven komo esklavas

Jer.Post: Es ke pensash ke egziste un sistema de dos pezos enverso Israel? La Amerika mato Usama Ben Laden i todos aplodyeron. Israel mato “Cheik Yassin” i resivyo dadas sovre las manos.

Sh. Peres: Las pozisyones son diferentes. La Amerika dirije el mundo, la Amerika tyene un rolo diferente del muestro. Si mirash byen la Amerika, no solo en el konteksto de Ben Laden, eya es la mas grande potensya del mundo. Eya fraguo su fuersa  sovre lo ke eya ofresyo al mundo i no sovre lo ke eya le tomo.

La kontribusyon Amerikana es ekstraordinarya i tyene tambyen grandes responsabilidades. 4000 Ameikanos fueron matados en  el atentado del 11 Septembre, esto no es un djugo de ninyos. Izyeron lo ke devian azer. I mozotros de mezmo izimos de la mizma manera.(fin del relato de la entrevista Jer.Post:/Shimon Peres).

Ansi avlo el prezidente de Israel, kon sezo, sehel i komprensyon  absoluta de la situasyon, el avlo “de los menesteres ansi ke de los doveres de la parte adversa”.

Komo lo dishe la semana pasada al empesijo de esta eskrita ,“Shimon Peres es antes de todo un  humanisto , su teoria politika es bazada sovre estas mizmas palavras ke el pronunsyo: “El Djudaizmo es fundado sovre el prinsipyo ke todos los ombres fueron kreados al imajen de Dyo. Muestras valores (etikas i humanitaryas) deven ser mas fuertes ke las politikas. Eyas son valores fundamentales”.