La Modestia

No es; ser espantozo, ser insufizyente (yetersiz), tener deskonfiensa. La modestia es; saver lo pozitivo i lo negativo de sus valores, de sus kapachitades, i no mostrarse otro modo al entorno, no dar emportansa a las hadras, ma dar emportansa a si propyo.

No alavarse de si para si, i no asperar ke el den frente te alave. Todos ya savemos la sinyifikasyon de la modestia, de la semplisitad; ma lo emportante es; si lo estamos puedyendo aplikar.

Demanyana kuando salimos a la kaye, estamos puedyendo sonreir (gülümsemek) a kualkyer (herhangi bir) persona ke rankontramos en muestro kamino? Es difisil de dar un saludo?

Ay munchas personas ke trokan sus kaminos para no saludar, u no konoser al den frente.

Ayudar a un vyejo para ke pase en frente, o moralmente darle un apoyo es muy difisil? Ser riko es un detenimyento (engel) para no ayudar?

Kualo peryemos si somos modestos i si keremos bien al den frente sin tener un entereso, un profito?

Deke tenemos ambisyones? Deke trespizar al den frente para pueder reushir? Deke no saludar kuando tienes un titolo emportante? Esto proviene de no tener la kerensya de aryento del korason, i de no tener la maturitad (olgunluk) de dijerar (hazmetmek) el posto (makam) ke tyene. 

Devemos de aminguar lo ke estamos asperando de la vida, arrepintirmos de muestras ambisyones.

Admeter (kabullenmek), akseptar todas las kozas negras ke vyene a la kavesa de una persona, adaptarse a la situasyon mueva para pueder kontinuar a bivir.

Lo mas emportante en la vida de una persona es;

La adaptasyon a los evenementos muevos.

La kerensya es la felisitad. La baza de la felisitad es; kontentarse de poko i ser lo ke somos (kendin olmak).

Ser mujer es un talento de organizasyon inkreivle. Las tradisyones son la baza de bivir i kontinuar la vida sovre las reglas. Si una mujer kere kualkyer koza, nada no la puede detener para reushir a azerlo i konkluir (sonuçlandırmak) la problema.

Entonses alhad ultimo tuvimos la okazyon de asistir a un kazamiento de meri de unos amigos komo ermanos. Fue un dia yena de emosyon para mi de ver la kapachitad de los mansevos para realizar este dia sakro.

Estuvimos envitados en un kafe donde las mezas estavan adonadas (süslenmiş) kon unas rozas de diferentes kolores i kon una aplikasyon (özen) spesyal.

El tyempo muy favorable, todos vistidos elegantes, los paryentes mos arrisivyeron kon las karas riyentes.

Era un dezayuno simple ma no mankava nada. Salados, dulsuryas, bevyentas, todo estava muy savrozo i abondante.

Todos avlando los unos kon los otros, komyendo bevyendo i riyendo. Una atmosfera yena de kerensya i modestia. Kuando vinyeron la novya i el novyo para el kazamiento de la meri (nikah), todos kon grande entuziasmo los aplodisaron.

La novya muy simple ma muy elegante, muy luzya, el novyo riyendo. Se estava vyendo ke estavan orozos.

Las madres i los padres okupandosen de los envitados kon amistad.

Kaliya ver la entimitad, la senseritad i la amistad entre los aedados i los mansevos.

Vos oguro keridos mios; sanedad, reushitad, parnasa i muncha felisitad...

La felisitad esta en muestra mano. La felisitad es el punto de vista (bakış açısı) ke tenemos, ser pozitivos, ser aliados (dost), i kerer bien a todos sin asperar nada del den frente.

Ambezaremos a muestros ijos, ijas, a los mansevos la Kerensya; para ke puedan bivir orozos, sin enemistad (kin), kon devuamyento (fedakarlık).