Martes ultimo tuve la okazyon i el plazer de asisitir a una seremoniya grandioza en el punto de vista de sentimyento, de senseritad i de onestetad; una seremoniya ke organizo la
Fakulta de Medicina de Cerrahpaşa, de la Universitad de Estambol, la parte de Reanimasyon i Anestezioloji (İstanbul Üniversitesi Cerrahpaşa Tıp Fakültesi, Reanimasyon ve Anestezyoloji Bölümü), por el Profesor presyozo Dr. Mois Bahar ke fue retratado (emekli) despues de 40 anyos de lavoro.
En la puerta del salon el Profesor kon su mujer i sus ijos mos arisivyeron kon karas riyentes, i su mirada dulse, en remersiandomos de muestra partisipasyon.
En el fondo del salon su fotografia dinya (vakur) entornada de rozas i de koronas multikolor akompanyada de una muzika.
Kaliya ver la novleza (asalet) de los profesores kon sus mujeres, vistidos muy elegantes kon kostumes fonses.
Munchos profesores i profesoras avlaron por el, los evenementos ke pasaron en enterval de estos anyos, komo lo konosyeron, su personalitad i sovre lo ke izo ganar a la umanitad, a su universitad, su komporto kon los hazinos i las famiyas de eyos, el komporto a sus asistantes, a sus ayudantes i lo ke puido ambezarles sovre la medicina i sovre la vida.
Una personalitad ke fue amado por todos, konsiderado, todo el tyempo meldando, eskrivyendo i partajando, kooperando kon los del entorno, syempre okupado sin tener tyempo vaziyo.
İzo su echo syempre kon grande plazer i de una manera perfekta, kon muncha pasensya, su egzistensya dyo syempre una grande konfiensa al den frente.
Una de sus kalitades es; ke su komporto fue syempre kon entuisyon (sağduyulu), i igual (eşit) a todos. No enaltesiya su boz, syempre kalmo, i muy laboryozo.
En el anyo 1990 fue uno de los fondatores de la Unitad del Cuidado Intensivo (Yoğun Bakım) de Noroshirurjia, ke enaltesyo esta partida (bölüm) de la fakultad, kon 14 kamas.
El fue el presidente del 28’en kongreso de Reanimasyon de la Evropa en Estambol en el anyo 2006. Le plaze muncho fondar asosyasyones, ampesa a echos diferentes en mizmo tyempo ma tyene la kapachitad de terminar todo. Konsuma (sarfetmek) muncho esforso komo volontaryo de edukasyon, (eğitim).
Prof. Mois Bahar es una persona ke aklara, ke da luz al den frente.
Kero partajar agora; la avla de la Profesora;
“Güner Kaya” ke me emosyono i me plazyo muncho.
“La Medicina (hekimlik) es un arte sakro. No deve de aver ser retratado en la medicina. Mi ermano grande Mois; lavoro muy muncho. Oy estamos aki para mostrarle muestra kerensya, muestra unyon, solidaritad i muestra amistad.
Noroshirurjia es la partida la mas emportante de la Anestezia. La kontribusyon (katkı) ke tyene a la edukasyon es muy grande. El doktor izo salir en medyo (ortaya çıkarmak) la konosensya (bilgi) i la kapachitad (beceri) de los mansevos. Reprezanto syempre la Universitad en la Turkiya i en los paises etranjeros en una manera perfekta. Dr. Mois es un aliado (dost) kon fidelidad, kon lealdad (vefalı).
Dyo munchos seminaryos. Esta enerjiya ke tyene es el orijen (kaynak) de su saveduria (bilgi, ilim).
No desho el livro de la mano, syempre meldo,i esta kontinuando a meldar.....
Ombre de sensya (bilim). Entri al lado de el sin tener preeminensya (kıdem). Me ambezi de el komo se komporta a la persona.
Lavoro 46 anyos en Cerrahpaşa. Syempre tuvo la kerensya de las islas i de la mar.
Protektor (koruyucu), kon buen korason, afektuozo, kerensyozo (sevecen), saver topar la felisitad (mutluluk) en una koza chika, todo esto me los ambezi del kerido amigo, ermano Mois. Fue el Presidente del Departamento de Reanimasyon (Kürsü başkanı) en Cerrahpaşa. Arreglo (düzenlemek) la edukasyon.
Un ombre ke pensa enriva de todo, i da desizyones emportantes i djustas, un savyo, (bilgin), un filozofiko (felsefi kişi).
- İzites preeminensya (kıdemlilik yaptın),
- Dates muncho esforso en tu lavoro,
- Ensenyates todo lo ke saves,
- Mos izites kerer byen muestra profesyon,
Te esto remersyando kerido amigo de aryento mi korason, i te esto ogurando munchas reushitades kon tu mujer Emel, tu ija Tanya i tu ijo Heymi.
Mersi muncho por todo..”....
Komo puedemos deskrivir Mois BAHAR?
Amigo i aliado de todos, una persona ke puede ambezar la lisyon de la vida (hayat dersi), komo se karga (yüklemek) responsabilitades, komo se desha independente al den frente, komo se ayuda a una persona sin ofender su orgolyo (gururunu incitmeden)
Su vista es, ke kale saver kerer byen la vida en todo modo de kondisyones. Syentifiko (bilimsel), persona ke se puede tomar konsejos, buena persona, buen karakter, no izo dingun yerro en su vida, no opero si no ay menester, pozitivo, amigo de korason, buen profesor, konsolador en los momentos los mas difisiles, da pasensya al den frente en rezolvando las problemas, un amigo diferente.
A la fin; Tanya i Heymi sus ijos; lo deskrivyeron komo padre sezudo (mantıklı), konsejero, yeno de kerensya, laboryozo i perfekto.
Ambezo a todos ke la kapachitad de la persona es muy grande i por esto kale lavorar muy muncho.El Profesor dize; ke los mansevos deven de suvir las eskaleras de la vida en koryendo, para reushir.
Enfin lo envitaron para prezentarle una plaket i un buketo de rozas a su mujer.
Mois Bahar tomo la palavra para remersyar a todos ke organizaron este dia sentimental.
Remersyo a todos sus kolaboradores, a todos ke partisiparon a esta seremoniya, i a los dirijentes de la komunitad djudiya.
“El Cuidado Intensivo i Cerrahpaşa fue mi famiya. Las valores profesyonales i las valores umanas me dyeron grande plazer. Las valores de mi profesyon me dyeron una idantitad.
Remersyo de todo mi korason mi mujer, mis ijos i todos vozotros”.
Todos aplodisaron kon antuziasmo i lo felisitaron kon kerensya.
Kerido Mois; i yo te oguro de agora adelantre, una vida kon sanedad, felisidad kon tu famiya entornada de amor i kerensya.
