Ya se puede dizir ke los tyempos se kayentaron, los dias se alargaron, la natura de kolores diferentes ya empeso a arrebivirse.
El enverano es una sezon ke se bive kon muncha alegria i gusto; porke los dias se alargan las noches se akurtan, i las personas se syenten mas orozos de todo modo de evenemento, esta sezon plaze a todos.
Munchos se van a las islas, otros viajan, i la majoritad ke se kedan en la sivdad se van a la mar, todo el tyempo pasa afuera, en las kayes.
Mizmo las frutas del enverano son mas atraktivas (çekici) komo serezas, kayısis, moras, avramilas i şeftelis.
El enverano arekayenta la persona. La kolor del syelo, de la mar, la natura ke se aribive kon las kolores briyantes, alegran a la persona i se deviene mas pozitivos i mas optimistos.
El enverano es una sezon ke traye la felisidad i el entuzyasmo (coşku) de bivir.
Las personas pueden profitar de las ermozuras de la natura, de la mar, del sol ke melizina los romatizmos.
La isla de Burgaz es la tresera komo grandor de las Islas de Prens de Estambol, ande ay sharas (orman), de pinos (çam), i munchas kazas elegantes de tavla antiguas. Bivir en esta isla es un privilejyo (ayrıcalık) para las personas. Burgaz es la isla la mas asolada i la mas natural entre las otras.
Burgaz es un sentimyento delisyozo, una amor, una pasyon espesyal, para los ke se auzaron a bivir aya anyos largos.
Veramente Burgaz es un kazal ke todos son komo una famiya. Komo mos arisiven los ke moran aya en invyerno!... El kasap, el frutero (manav), el bakkal, el vendedor de agua, el patisyero i los arabacis....
El aver limpyo, la mar a dos pasos, el kalmo mos repoza de la vida kanseryoza i reboltoneyoza ke tenemos en la sivdad. Kale ke sepamos la valor de esta rikeza.
Por enalteser muestra enerjiya en enverano, kale en primero echar tino a lo ke estamos komyendo i bevyendo. Kale komer mas muncha zarzavat i fruta, i bever muncha agua. Kaminar medya ora a lo menos kada dia, estar i pasar el tyempo kon las personas ke tyenen una enerjiya alta.
En todas las famiyas ay munchas reboltinas, kon los echos, ijos, la sanedad i munchas otras kozas.
“En kada kaza una braza” diziya mi granmama (ke este en ganeden). Ya es verdad, kozas ke no asemejan unos kon los otros.
Para alesharmos de estas problemas de la semana, pasar un shabat i un alhad en un kazal komo Burgaz es una shans grande para mozotros.
Alevantar temprano i ver el nasimyento del dia, la kolor kolorada del sol, kaminar una ora en el kamino entre los arvoles golyendo al miskle, kon el ayre dulse en el bodre de la mar, iyir a la mar, nadar, ver a los amigos, aunarmos kon los keridos, es una shena ke se bive kada anyo al empisijo de esta sezon yena de aktivitades.
Bivir en Burgaz el enverano es un privilejyo!...
