Parafrazando el titolo de un artikolo de Bernard Henri Levy sovre el mizmo sujeto, me permeti de entitolar la prezente eskrita de una manera muy semejante, sin por esto ninguna similitud kon el kontenido del teksto otramente profundo i sofistikado del byen konosido filozofo, i esto aunke me avia prometido de mi para mi de no revenir sovre el kavzo DSK,
Tambyen, esto inspira una anksyedad kaji kolektiva, no solo porke el inkulpado es una persona ke durante su prezidensya al seno del “Fundo Monetaryo Internasyonal”, realizo (malgrado la terrivle kriza ekonomika aktual al nivel mundyal) un grande adelantamyento, i pudo mizmo introduzir, komo lo disho uno de sus ansyanos kolavoradores, una nota de humanizmo en la rigor de la jeransya de la grande Institusyon.
No... no es por las performansas ke DSK kumplio, ke este fakto mos revyene kontinualmente al tino, ma por “el fakto el mizmo”...I tambyen, por la kontinuidad del trokamyento de novedades en multiples gazetas... Enfin, por ke parese egzistir komo un komploto entre el azardo i el destino de un ombre i sovre todo porke (una vez mas) sentimos ke mos topamos en un mundo ande la instabilidad es el elemento mayor de baza...
En este kavzo, el futuro de “Dominique Strauss Kahn” parese ser entregado a la fantezia i a la parsyalidad de una opinyon publika munchas vezes irrasyonal porke munchas vezes mal informada, i kaji syempre ambyerta de todo lo ke puede arrankarla al marazmo de una epoka de difikultades.
Munchos faktores paresen intervenir en el enkaminamyento de la aksyon juridika eya mizma:
Primo )la frajilidad seksual del personaje sentral, ke no es mas un sekreto para ninguno, faktor ke djugo un rolo agravante i mizmo kaji determinante en el fakto de tratar este grande intelektual, desde el empesijo, komo kapable de kometer un akto semejante, mizmo si a la sigida de un poko de refleksyon, la koza fue konsiderada si no imposivle ma a lo menos muy improbable.
Segundo) El sistema juridiko Amerikano, ke mos parese inkomprensivle, i el illojizmo de konsiderar komo kulpavle kualkyer persona akuzada, antes mizmo de tomar la pena de enkuestar o refleshir sovre la gravedad de la akuzasyon..
Tersyo) la terrivle fotografia de Dominique Strauss Kahn, las manos atadas detras la espalda, fotografia ke produzyo olas insesantes de reaksyones kontradiktoryas , las unas yenas de revolta kontra la indinyidad del sistema , otras empapadas de un plazer malsano de asistir a la degradasyon de un ombre ke avia ayegado al punto kulminante de la reushita...
Si, en desparte de esto, parese ke uvo (tal ke lo dishe mas arriva) komo un terrivle komploto entre el hazardo i el dezastre, un djenero de fatalidad a la kuala se adjuntaron faktores humanos: el selo, las rivalidades al nivel personal , i agora, en Fransya mizmo, la voluntad morbida de una mujer “Tristane Banon” ke pretende aver sido importunada a la edad de 23 o 24 anyos. por una tentativa seksual de la parte de la mizma persona.
Antes de todo el byervo “tentativa” tyene una sinyifikasyon muy ancha, indo de ”palavrikas galantes” o “des propozisyones mas insistyentes” asta “djestos direktos”.
Ay entre la tentativa de un akto i su kumplimyento,“una fraksyon de tyempo ande todo se djuga, ande lo ke era tentasyon o simple intisyon toma puerpo i puede devenir akto”...
Si tal fue el kavzo, deke esta dama aedada aktualmente de 32 anyos, no se kesho immedyatamente? deke desho pasar 8 o 9 anyos? Deke eskojo el momento el mas rezikozo , para azer lo? Es muy fasil de dar un ultimo golpe al arvole ke la opinyon publika ( enlokada por una prensa inkoherente i un interkambyo de e-mailes personales sin ninguna baza de real otentisidad) ya abatyo a mitad... si es muy fasil ma tambyen muy vil.
I aktualmente mos topamos delantre una situasyon ekivoka:
De una parte el rezultado de una enkuesta echa por los inspektores mizmos del Prokuror Jeneral, prinsipal organo juridiko de la akuzasyon, el kual prova ke la primera imajen pozitiva de la pretendida viktima de orijen afrikana, es absolutamente falsa, i ke sus primeras deklarasyones yenas de paradoksos i kontradiksyones azen dubyar de sus verasidad.
De otra vanda en una syerta partida del ancho publiko perpetualmente ambyerto de novedades sensasyonales:,“la rumor”, la rumor persistyente echa puede ser de una “parsela de verdad” o byen de una “iluzyon de la verdad”, al torno de la kuala se enrolo i ainda se enrola imperseptiblement todo lo ke kada uno ke la oye i la transmete adjunta personalmente, sin mizmo renderse kuento de su responsabilidad.
Munchos grandes juristos pensan ke uvo puede ser relasyones seksuales konsentidas de las dos partes, ma no agresyon, lo ke no konstitue una kulpa al nivel juridiko...
Se topo trasas de spermo ma ningun sinyo de violensa en kualkyer lugar del puerpo, ‘markas inevitavles en kavzo de asalto’ dizen los medikos i los psikyatres
Ke mos ambezo el kavzo DSK? Simplemente la prekaridad del destino humano ke se topa, komo lo avia dicho Blaise Pascal “ En medyo, entre ‘nada’ i ‘el infinito!’ ”.
Esto deve pushar munchas personas a byen refleshir antes de akuzar en vano.
