Desde kaji 15 dias, nombrozas manifestasyones son organizadas kontinualmente en las grandes sivdades de Israel, reklamando una reduksyon de los presyos de komanya i de las moradas a alkilar ke pujaron de 60% en 4 anyos,
komo tambyen la reduksyon de los gastes de eskolarizasyon de los ninyos i del koste de los kudyos vitales en kavzo de desrepozo de la salud…
Son miles i miles a kaminar en sllensyo, ken kon su ninyo en los brasos, ken pushando chikos landos de rezin nasidos, reklamando pasifikamente sus derechos, sostenidos por nombrozas asosyasyones sosyales, i mizmo por munchos myembros del Likud.
No mos olvidaremos ke Israel es un payis fundamentalmente demokratiko ande los klivajes sosyo ekonomikos son mas o menos fasil a rezolver i ande malgrado, o puede ser grasyas a la kompleta libertad de ekspresyon, los problemas populares topan la mas parte del tyempo una solusyon pasifika.
